Toshkent shahri Chilonzor tumanida erkak xotini, farzandi, qaynonasi va qaynsinglisini pichoqlagani haqida xabar berilgandi. Sog‘liqni saqlash vazirligi jabrlanuvchilarning sog‘lig‘i haqida ma’lumot berdi.
Qayd etilishicha, 21-iyul kuni soat 21:10 da Respublika shoshilinch tibbiy yordam ilmiy markaziga jarohat olgan to‘rt nafar bemor tez yordam mashinasida og‘ir ahvolda olib kelingan. O‘ta tezkorlik bilan o‘tkazilgan tibbiy tekshiruvlar natijasida birinchi bemor — S.D. (1994-yilda tug‘ilgan)ga ko‘krak va qorinoldi devori o‘tuvchi qo‘shma kesib-sanchilgan yarasi, o‘ng o‘pka va ingichka ichak jarohati, chap yelka kesib-sanchilgan ko‘plab yaralari tashxisi qo‘yilgan.
Ikkinchi bemor — O.L. (1965-yilda tug‘ilgan) chap ko‘krak qafasi kesib-sanchilgan yarasi, chap o‘pka jarohati, ko‘krak o‘ng qafasi o‘tmas kesib-sanchilgan yarasi, pnevmogemotoraks, chap bilak va kaft ko‘plab kesib-sanchilgan yaralari tashxisi bilan shoshilinch ravishda jarrohlik stoliga yotqizilgan.
Uchinchi bemor — X.N. (1990-yilda tug‘ilgan) qorinoldi devori o‘tuvchi kesib-sanchilgan yarasi, jigar chap bo‘lagi va oshqozonosti bezi jarohati, o‘ng qo‘ltiq sohasi o‘tmas kesib-sanchilgan yarasi diagnozi bilan operatsiyaga olingan.
To‘rtinchi bemor — yetti yoshli M.A.da ko‘krak va qorinoldi devori o‘tuvchi qo‘shma kesib-sanchilgan yarasi, katta charvi eventeratsiyasi, taloq, ingichka ichak va diafragma jarohati aniqlangan. Unda bolalar bo‘limida jarrohlik amaliyoti o‘tkazilgan.
Murakkab va yuqori texnologik jarrohlik amaliyotlari bir paytning o‘zida to‘rtta tibbiyot brigadasi tomonidan bajarilgan. Amaliyotdan so‘ng ular reanimatsiya bo‘limiga yotqizilgan. Kechadan esa barchasi xirurgiya bo‘limiga olingan.
Respublika shoshilinch tibbiy yordam ilmiy markazi direktori Doniyor Alimovning ma’lum qilishicha, ayni paytda to‘rt nafar bemorning ham ahvoli barqaror. Stabillashgan. Ijobiy tarafga o‘zgarish bor.
“Sog‘liqni saqlash vazirligi ularning holatini nazoratga olgan. Bemorlarga markazning eng malakali mutaxassislari tomonidan standart asosida tegishli tibbiy yordam ko‘rsatilyapti”, — deyiladi xabarda.
Izoh (0)