Toshkent davlat iqtisodiyot universiteti rektori Qo‘ng‘irotboy Sharipov “Daryo” nashriga bergan intervyusida yoshlarga repetitorga borgandan ko‘ra, mustaqil ta’lim olishni o‘rganish yaxshiroq ekanini aytdi.
Qo‘ng‘irotboy Sharipovning ta’kidlashicha, bolalar yoshligidan yaxshi o‘qishga o‘rganishi kerak.
“Men Qoraqalpog‘iston Respublikasining Qo‘ng‘irot tumanidagi chekka bir qishloqda katta bo‘lganman. Oddiy maktabda o‘qiganman. Qo‘shimcha darsga – repetitorga bormaganman. Maktabda o‘qirdik, uyga kelganimizdan keyin ota-onamiz majburlab dars qildirardi. O‘zimizni ustimizda ishlaganmiz.
Hozir odamlarni fikri o‘zgarib ketgan: repetitorga bormasang, o‘qishga kirolmaysan, degan ganlar aytiladi. Bola yoshligidan yaxshi o‘qishni o‘rganishi kerak. Masalan, maktabda matematika fanidan bitta misolni bir usulda yechishni o‘rgatadi. Bola uyga kelib, shu misolni ikki-uchta usulda yechishni o‘rgansa, unda olgan bilimi bir umrga qoladi.
Afsuski, o‘tgan 30 yilda o‘qituvchining ham motivatsiyasi bo‘lmadi. Doim uni ko‘chaga haydadik, paxtaga chiqardik, bolalar ham shu ish bilan yurdi. Natijada o‘qituvchilar o‘z kunini bir narsa qilib ko‘rish uchun bozorga chiqib ketishdi. O‘qishga bo‘lgan qiziqishni yo‘qotib qo‘ydik. Bola maktabdan kelganidan darrov molga o‘t terib kelishi yoki ko‘chada ozgina tadbirkorlik qilishi, ya’ni pul topib kelish muammosi bo‘lib qoldi.
Hayot shu darajaga borib qolgan edi. Shuning uchun odamlar “o‘qiganing bilan nima bo‘lasan, bugungi kunimizni yashaylik”, degan prinsipda yashagani uchun ham ko‘p narsalarni boy berib qo‘ydik. Endi-endi bu narsalar qaytadan tiklanyapti. Misol uchun, hozir professor-o‘qituvchilarni oyligi o‘ziga yetadigan davr, maza qilib ishlaydigan vaqt. Maktab tizimi ham yaxshilanib kelmoqda. Yoshlarda o‘qigan bola kelajakda katta maqsadlarga erisha oladi, degan tuyg‘uni va shunga ishonchni uyg‘otishimiz kerak”,– dedi universitet rahbari.
Avvlroq Qo‘ng‘irotboy Sharipov bolalar maktabda 9 yil, litseyda 3 yil o‘qib ham, chet tilini mukammal o‘rgana olmayotganining sabablarini aytgandi. Shuningdek, u universitetda ayrim o‘qituvchi-professorlar 10 000 dollardan ortiq maosh olgani to‘g‘risida ham gapirgan.
Izoh (0)