Тошкентда 25—26 июль кунлари «Афғонистон: хавфсизлик ва иқтисодий ривожланиш» мавзусидаги Афғонистон бўйича халқаро конференцияси бўлиб ўтмоқда, деб хабар берди «Дарё» мухбири.
Унда Ўзбекистон ташқи ишлар вазири вазифасини бажарувчи Владимир Норов маъруза қилди. Вазир ўз нутқида Афғонистон ҳукумати олдида турган муҳим вазифаларни санаб ўтди.
«Муваққат ҳукумат томонидан халқаро ҳамжамиятнинг асосий талаблари, жумладан, кенг вакилликка асосланган инклюзив ҳукумат тузиш, хотин-қизлар ҳуқуқларини таъминлаш ва миллий озчиликлар, шунингдек, афғонларнинг тўла ҳуқуқли мактаб таълимига қабул қилиниши бўйича зудлик билан амалга оширилиши керак бўлган вазифаларни таъкидлади. Бу бутун афғон халқи учун тинч келажак кафолатидир», — деди Ўзбекистон ТИВ раҳбари.
Шундан сўнг Ўзбекистон президентининг ташқи сиёсат масалалари бўйича махсус вакили Абдулазиз Комилов Ўзбекистон президенти Шавкат Мирзиёевнинг конференция иштирокчиларига мурожаатини ўқиб эшиттирди.
Ўзбекистон ташқи ишлар вазири в.б. Владимир Норов Бирлашган Миллатлар Ташкилоти Бош котиби Антонио Гуттеришнинг конференция иштирокчиларига йўллаган табригини ўқиб эшиттирди.
Конференциянинг очилиш маросимида Афғонистон ташқи ишлар вазири в.б. Амирхон Муттақий маъруза қилди.
Нуфузли тадбирда Марказий ва Жанубий Осиё, Европа, Америка, Яқин ва Ўрта Шарқ, Осиё-Тинч океани минтақаларининг Афғонистонда барқарорликни тиклашга бевосита жалб этилган 20 дан ортиқ давлатнинг Афғонистон бўйича махсус вакиллари, ўнлаб халқаро ва минтақавий ташкилотлар, жумладан, БМТ, Европа Иттифоқи, БМТнинг Озиқ-овқат ва қишлоқ хўжалиги ташкилоти (FAO), Иқтисодий ҳамкорлик ташкилоти, Ислом ҳамкорлик ташкилоти, Шанхай ҳамкорлик ташкилоти раҳбарлари ва мутахассислари, шунингдек, Афғонистон Муваққат ҳукумати делегацияси иштирок этмоқда.
Анжуманда Афғонистонни ижтимоий-иқтисодий жиҳатдан тиклаш, афғон халқининг ҳозирги ва келгуси авлодлари учун узоқ кутилган тинч ҳаётни таъминлашга қаратилган инфратузилма ва ижтимоий лойиҳаларни амалга ошириш ва бошқа бир қатор долзарб масалалар кўриб чиқилади.
Шунингдек, халқаро конференция доирасида қўшни Афғонистонда иқтисодий барқарорликни тиклашга қаратилган гуманитар ва инфратузилма лойиҳалар тақдимоти ҳам бўлиб ўтади.
Изоҳ (0)