Хонанда Шаҳноза Отабоева MY5 телеканалининг «Омон-омон» кўрсатувига берган инервюсида вазни сабабли 5 йил саҳнада кўриниш бермагани, жарроҳлик йўли билан қилинган операциядан сўнг 4 ойда 35 кг озгани ва ҳозир ўзини жуда яхши ҳис қилаётгани, кўпчилик унинг маслаҳати билан шу операцияни қилдиргани ҳақида гапирди.
Шаҳноза Отабоева вазни сабаб 5 йил саҳнага чиқмагани ҳақида
«Бу ишни ҳамма билди, чунки мен ҳеч кимдан беркитиб қилмадим. Биринчи навбатда яхши шифокор танлай олиш керак экан, сабаби бу сизнинг ҳаётингиз билан боғлиқ. Кўпчилик билан маслаҳатлашдим. Аёл киши фарзанд кўргандан кейин барибир семиради. Айниқса, COVID-19 дан кейин кўп ўзгаришлар бўлди, яшаш учун курашдик. Яқинда Озарбайжондан келган шифокорга бордим ва жарроҳлик йўли билан озиш учун операция қилдирдим. Шифокорга борганимда вазним 113 кг эди, операция қилдирганимдан кейин 4 ойда 80 кг бўлдим. Ўзимни жуда яхши ҳис қиляпман, чунки 5 йил саҳнадан қочиб юргандим. Вазним сабабли клип ололмадим, саҳнага чиқолмадим. Озиш учун ҳамма нарса қилдим, фойдаси бўлмади», — дейди хонанда.
Жарроҳлик операциясидан олдинги ҳолати ва ундан кейин 35 кг вазн йўқотгани ҳақида
«Операция қилдириш ҳақида кўп аёлларга айтяпман. Санъаткор бўлганингиздан кейин шу ҳолат бўлса, кўпчиликдан қочар экансиз, одамлардан уяларкансиз. Дўконга киришим билан сизга мос ўлчамдаги кийим йўқ дейишлари кўнглимга тегарди. Бирор нарса тиктирсангиз, ярашмайди, ойнага қарагингиз келмайди, бу тўла вазнли аёлларимизда оддий ҳол. Шунақа воқеалар бўлган. Жуда қийналдим, стресс бўлди, бу ҳолатни бошдан кечирган одам билади. Мен 35 кг вазн ташладим, яқинда бориб шифокор кўригидан ўтгандим. Ҳозир ўзимни жуда енгил ҳис қиляпман, худди 15 йил олдинги, клипимдаги стюардесса кўринишида бўлган Шаҳнозага қайтгандекман. Бу реклама эмас, ўзим бошдан кечирганим учун буни кўпчиликка тавсия қилдим. Кўпчилик Instagram саҳифамда 5-6 ойдан бери мени кузатиб келади, айримлари худди шу жарроҳлик операциясини қилдирди ва менга раҳмат айтди» , — дейди Шаҳноза Отабоева интервьюсида.
«Кўпчилик нотўғри маълумот берган, ҳамма қатори овқат еймиз. Бироқ 1-2 ой диета қилиш керак, сабаби операция жойлари битиши керак. Шундан кейин ҳамма нарса ейиш мумкин, лекин озгина есангиз ҳам, тўйиб қоласиз. Тўғри овқатланишда ҳам кам, бироқ тез-тез, яъни 5-6 маҳал таом истеъмол қилинади. Мен ҳам айнан шунга амал қиламан, озгина еб тўйиб қоламан. Аввал 2 коса овқат есам ҳам, тўймасдим, ҳозир 2-3 қошиққа тўйиб қоламан. Асосийси, ижодга қайтдим, соғломман, ҳаётдан завқланиб яшаяпман. Олдин менга кийим топиш муаммо эди, ҳозир кийим танлаяпман. Бу аёл киши учун бахт» , — дейди хонанда.
Маълумот учун, Шаҳноза Отабоева январь ойида озарбайжонлик шифокор Ҳабил Қафаровга озиш учун жарроҳлик операциясини қилдирган эди. У операциядан кейин Instagram саҳифасидаги обуначиларига аҳволи яхши эканини, ўзини енгил ҳис қилгани, умуман оғриқларсиз операцияни бошдан кечирганини айтган.
«Ассалому алайкум, азиз обуначиларим. Мен ўзимга келдим, аҳволим яхши. Шифокорнинг қўли енгил экан, умуман оғриқни ҳис қилмадим. Озгина ошқозоним оғрияпти, лекин бу катта муаммо эмас» , — деган эди Шаҳноза Отабоева.
Мавзуга доир: 40 килодан 60 килогача. Ошқозон кичрайтириш операцияси орқали озаётган ўзбекистонлик машҳурлар (фото, видео)
Изоҳ (0)