Мьянмада тўрт нафар мухолифатчи террорчиликда айбланиб қатл этилди, деб хабар бермоқда Reuters. Бу мамлакатда сўнгги ўн йилликлардаги биринчи қатл. Ҳукм қай тарзда ижро этилгани номаълум, илгари Мьянмада олий жазо осиш йўли билан амалга оширилар эди.
Қатл этилганлар орасида 53 ёшли ёзувчи Ко Жимми ва Мьянманинг биринчи рэпери Пё Зея То ҳам бор, деб ёзган мухолифатчи «Иравади» нашри Twitter’да.
Бирлашган Миллатлар Ташкилотининг Мьянмадаги Инсон ҳуқуқлари бўйича махсус маърузачиси Том Эндрюс «мянмалик ватанпарварлар ҳамда инсон ҳуқуқлари ва демократия ҳимоячилари»нинг қатл этилишидан ғазаблангани ва қайғуга тушганини айтди.
«Бу ахлоқсиз ҳаракатлар халқаро ҳамжамият учун бурилиш лаҳзаси бўлиши керак», — дея қўшимча қилди у.
2021 йилнинг 1 февралида Мьянмада ҳокимият ҳарбийлар қўлига ўтганди. Ўша куни мамлакат парламенти иш бошлаши, яъни ҳукуматнинг янги таркибини тасдиқлаши керак эди. Армия ўзининг сиёсий вазиятга аралашувини парламент сайловлари пайтида сайловчилар рўйхатининг сохталаштирилгани ва шу сабабли бошланган тартибсизликлар билан изоҳлади.
Мьянма президенти Вин Мин, давлат маслаҳатчиси Аун Сан Су Чжи ва ҳукмрон «Демократия учун миллий лига» партиясининг бошқа етакчилари ҳибсга олинган. Қуролли кучлар қўмондони, катта генерал Мин Аунг Хлайн муваққат президент бўлди. Мамлакат бўйлаб норозилик намойишлари бошланди, уларни бостириш оқибатида юзлаб ўлимлар қайд этилди.
Мамлакатда айни пайтда фавқулодда вазият амал қилмоқда. 2021 йилнинг 5 мартида Қўшма Штатлар Мьянма Ички ишлар вазирлиги ва Мудофаа вазирлигига қарши санкциялар киритди.
Изоҳ (0)