Italiya parlamentiga muddatidan oldin saylovlar 25-sentabrda bo‘lib o‘tadi. Tegishli farmonni Italiya prezidenti Serjo Mattarella imzoladi, deya xabar bermoqda Aksanews.
Avvalroq Mattarella parlamentni tarqatib yuborish to‘g‘risidagi farmonni imzolagan edi. Uni tarqatishga mamlakat hukumatidagi bo‘linish va buning ortidan bosh vazir Mario Dragining iste’foga chiqishi sabab bo‘ldi.
Prezident kanselyariyasining ma’lum qilishicha, hukumatning amaldagi tarkibi “joriy muammolarni hal qilish” vakolatlarini amalga oshirishda davom etadi.
Dragining iste’foga chiqishiga hukmron koalitsiya tarkibiga kiruvchi “Besh yulduz harakati” partiyasining bosh vazir jamoasi tomonidan taqdim etilgan “Inflyatsiya tufayli aholiga yordam ko‘rsatish to‘g‘risida”gi qonun loyihasi bo‘yicha ovoz berishda ishtirok etishdan bosh tortgani sabab bo‘ldi. Partiya taklif etilayotgan ayrim chora-tadbirlarga qarshi.
Mattarella Dragining iste’fosini birinchi so‘rovda qabul qilmagan edi. Prezident bosh vazirga parlament bilan maslahatlashishni tavsiya qilgan. 20-iyul kuni Italiya parlamenti Dragiga ishonch votumi to‘g‘risidagi rezolyutsiyani qabul qildi. Ammo bu hukumatni bo‘linishdan qutqara olmadi: uchta asosiy koalitsiya partiyasi — “Besh yulduz harakati”, “Olg‘a Italiya” va “Liga” ovoz berishda qatnashishdan bosh tortdi. Shundan so‘ng Dragi ikkinchi marta iste’foga chiqishini e’lon qildi va bu safar prezident uning so‘rovini qabul qildi.
Izoh (0)