Avval xabar berilganidek, 25 iyun kuni O‘zbekiston Konstitutsiyasiga o‘zgartishlar kiritish to‘g‘risidagi qonun loyihasi jamoatchilik muhokamasiga qo‘yildi.
Unga ko‘ra, iqtisodiy faoliyatda insofsiz raqobatga, monopollashtirishga yo‘l qo‘yilmasligi Bosh qomusimizda belgilab qo‘yilmoqda.
Prezident Shavkat Mirziyoyevning joriy yil 20 iyun kuni Konstitutsiyaviy komissiya a’zolari bilan o‘tkazilgan uchrashuvidagi ma’ruzasida “Davlat... erkin va halol raqobatning himoya qilinishi, iqtisodiy faoliyatda monopollashtirishga yo‘l qo‘yilmasligini kafolatlashi lozim” deb ta’kidlanib, mazkur yo‘nalishdagi konstitutsiyaviy islohotlarni asosiy yo‘nalishi sifatida belgilab berildi.
Konstitutsiya iqtisodiy erkinlikni tan olish va unga barcha shart-sharoitlarni yaratish bilan birgalikda, tadbirkorlarga iqtisodiy erkinlikni suiiste’mol qilgan holda monopolistik faoliyatni amalga oshirish yoki bir-biri bilan insofsiz raqobat qilishni oldini olishga doir qoidalarni belgilashi kerak. Bugungi kunda, samarali raqobat muhitini yaratish hamda tovarlar va xizmatlar bozoridagi monopoliyani bosqichma-bosqich kamaytirish iqtisodiyotni yanada rivojlantirish va liberallashtirishning ustuvor yo‘nalishi hisoblanadi.
Harakatlar strategiyasi doirasidagi islohotlar natijasida barchaga teng va erkin raqobat sharoiti yaratildi. Tadbirkorlik subyektlariga soliq yuki kamaytirildi, xususan mol-mulk, daromad va ijtimoiy soliq stavkalari 2 barobar pasaytirildi, qo‘shilgan qiymat solig‘i 20 foizdan 15 foizga tushirildi, muhimi, soliq majburiyatlarini o‘z vaqtida ixtiyoriy bajarilish darajasi 80 foizdan 95 foizga ko‘tarilganidan ham bilish mumkin. Shuningdek, adolatli raqobat tamoyillarini joriy etishni ta’minlash maqsadida 84 ta turli samarasiz soliq imtiyozi bekor qilindi.
Konstitutsiyaga kiritilayotgan ushbu norma raqobatni ta’minlash va monopolistik faoliyatiga qarshi kurash orqali davlat tomonidan tovar va xizmatlar bozorining barcha ishtirokchilari uchun teng iqtisodiy-huquqiy imkoniyatlar yaratadi. Yangi O‘zbekistonning Taraqqiyot strategiyasida ham “Yangi O‘zbekiston – raqobatbardosh mahsulotlar yurti” g‘oyasi asosida 200 ta eksportchini ochiq tanlov asosida saralab, ularni yetakchi eksportyorlarga aylantirish va har tomonlama qo‘llab-quvvatlash vazifasi belgilangan.
Izoh (0)