Аввал хабар берилганидек, 25 июнь куни Ўзбекистон Конституциясига ўзгартишлар киритиш тўғрисидаги қонун лойиҳаси жамоатчилик муҳокамасига қўйилди.
Унга кўра, иқтисодий фаолиятда инсофсиз рақобатга, монополлаштиришга йўл қўйилмаслиги Бош қомусимизда белгилаб қўйилмоқда.
Президент Шавкат Мирзиёевнинг жорий йил 20 июнь куни Конституциявий комиссия аъзолари билан ўтказилган учрашувидаги маърузасида «Давлат... эркин ва ҳалол рақобатнинг ҳимоя қилиниши, иқтисодий фаолиятда монополлаштиришга йўл қўйилмаслигини кафолатлаши лозим» деб таъкидланиб, мазкур йўналишдаги конституциявий ислоҳотларни асосий йўналиши сифатида белгилаб берилди.
Конституция иқтисодий эркинликни тан олиш ва унга барча шарт-шароитларни яратиш билан биргаликда, тадбиркорларга иқтисодий эркинликни суиистеъмол қилган ҳолда монополистик фаолиятни амалга ошириш ёки бир-бири билан инсофсиз рақобат қилишни олдини олишга доир қоидаларни белгилаши керак. Бугунги кунда, самарали рақобат муҳитини яратиш ҳамда товарлар ва хизматлар бозоридаги монополияни босқичма-босқич камайтириш иқтисодиётни янада ривожлантириш ва либераллаштиришнинг устувор йўналиши ҳисобланади.
Ҳаракатлар стратегияси доирасидаги ислоҳотлар натижасида барчага тенг ва эркин рақобат шароити яратилди. Тадбиркорлик субъектларига солиқ юки камайтирилди, хусусан мол-мулк, даромад ва ижтимоий солиқ ставкалари 2 баробар пасайтирилди, қўшилган қиймат солиғи 20 фоиздан 15 фоизга туширилди, муҳими, солиқ мажбуриятларини ўз вақтида ихтиёрий бажарилиш даражаси 80 фоиздан 95 фоизга кўтарилганидан ҳам билиш мумкин. Шунингдек, адолатли рақобат тамойилларини жорий этишни таъминлаш мақсадида 84 та турли самарасиз солиқ имтиёзи бекор қилинди.
Конституцияга киритилаётган ушбу норма рақобатни таъминлаш ва монополистик фаолиятига қарши кураш орқали давлат томонидан товар ва хизматлар бозорининг барча иштирокчилари учун тенг иқтисодий-ҳуқуқий имкониятлар яратади. Янги Ўзбекистоннинг Тараққиёт стратегиясида ҳам «Янги Ўзбекистон – рақобатбардош маҳсулотлар юрти» ғояси асосида 200 та экспортчини очиқ танлов асосида саралаб, уларни етакчи экспортёрларга айлантириш ва ҳар томонлама қўллаб-қувватлаш вазифаси белгиланган.
Изоҳ (0)