Guliston xalq ta’limi bo‘limining Telegram kanalida agressiv mazmundagi post e’lon qilindi. Ijtimoiy tarmoqlarda ushbu post tanqidlarga uchradi. Shundan so‘ng, post o‘chirib yuborildi. Holat yuzasidan Xalq ta’limi vazirligi matbuot kotibi Laylo Rustamova munosabat bildirdi.
Qayd etilishicha, holatni o‘rganish davomida agressiv mazmunda yozilgan ushbu post Guliston shahar xalq ta’limi bo‘limi nomidan ochilgan sahifada e’lon qilingani va keyinroq post o‘chirilgani tasdiqlandi.
“Ushbu material boshqa ijtimoiy tarmoq sahifalaridan olingan bo‘lib, soha xodimlarning beparvoligi va mas’uliyatsizligi oqibatida kanalga joylangan. Lekin bu narsa ushbu holatga yo‘l qo‘ygan mas’ulni javobgarlikdan ozod qilmaydi.
Ayni vaqtda mazkur holat bo‘yicha Xalq ta’limi vazirligi tomonidan xizmat tekshiruvi olib borilmoqda hamda ushbu holatga yo‘l qo‘ygan mas’ul xodimlarga tegishli choralar ko‘rilishi ta’minlanishini ma’lum qilamiz.
O‘rganish natijalari hamda ko‘rilgan choralar xususida kun yakuniga qadar batafsil ma’lumot berib o‘tiladi.
Shu o‘rinda soha xodimlaridan har qanday ma’lumot yoki postni e’lon qilishdan oldin uning mazmuni va oqibati nimalarga olib kelishi mumkinligini, so‘z mas’uliyatini unutmasliklarini so‘rab qolamiz”, – deyiladi munosabatda.
Izoh (0)