Гулистон халқ таълими бўлимининг Telegram каналида агрессив мазмундаги пост эълон қилинди. Ижтимоий тармоқларда ушбу пост танқидларга учради. Шундан сўнг, пост ўчириб юборилди. Ҳолат юзасидан Халқ таълими вазирлиги матбуот котиби Лайло Рустамова муносабат билдирди.
Қайд этилишича, ҳолатни ўрганиш давомида агрессив мазмунда ёзилган ушбу пост Гулистон шаҳар халқ таълими бўлими номидан очилган саҳифада эълон қилингани ва кейинроқ пост ўчирилгани тасдиқланди.
«Ушбу материал бошқа ижтимоий тармоқ саҳифаларидан олинган бўлиб, соҳа ходимларнинг бепарволиги ва масъулиятсизлиги оқибатида каналга жойланган. Лекин бу нарса ушбу ҳолатга йўл қўйган масъулни жавобгарликдан озод қилмайди.
Айни вақтда мазкур ҳолат бўйича Халқ таълими вазирлиги томонидан хизмат текшируви олиб борилмоқда ҳамда ушбу ҳолатга йўл қўйган масъул ходимларга тегишли чоралар кўрилиши таъминланишини маълум қиламиз.
Ўрганиш натижалари ҳамда кўрилган чоралар хусусида кун якунига қадар батафсил маълумот бериб ўтилади.
Шу ўринда соҳа ходимларидан ҳар қандай маълумот ёки постни эълон қилишдан олдин унинг мазмуни ва оқибати нималарга олиб келиши мумкинлигини, сўз масъулиятини унутмасликларини сўраб қоламиз», – дейилади муносабатда.
Изоҳ (0)