Sardoba tumanidagi Xovotog‘ aholi yashash punktida yashovchi fuqaro B.A. kuydirgi (Sibir yarasi) kasalligiga gumon qilingan edi. Hodisa yuz bergan hudud tuprog‘idan olingan namunalarda kasallik qo‘zg‘atuvchisi aniqlanmagan. Bu haqda Veterinariya va chorvachilikni rivojlantirish davlat qo‘mitasi matbuot kotibi Anvar Suyunov “Daryo”ga ma’lum qildi.
Qo‘mita axborotida aytilishicha, mazkur holatni Hayvonlar kasalliklari tashxisi va oziq-ovqat mahsulotlari xavfsizligi davlat ilmiy markazi to‘liq o‘rganib chiqqan.
“Sardoba tumani, ‘Zomin’ mahalla fuqarolari yig‘ini, Xovotog‘ qishlog‘idagi jami 35 ta xonadonda parvarishlanayotgan qishloq xo‘jaligi hayvonlari 2022-yil reja grafigi asosida fevral oyi boshida (jami 241 bosh yirik, 231 bosh mayda shoxli hayvonlar) kuydirgi kasalligiga qarshi to‘liq profilaktik emlangan. Holatni o‘rganish bo‘yicha tashkil etilgan shtab mutaxassislari tomonidan qoramol so‘yilgan joydan olingan tuproq namunalari va so‘yilgan qoramolning kalla-pochasi hamda teri qoldiqlari bakteriologiya, parazitologiya va mikrobiologiya laboratoriyasida to‘liq analiz qilindi”, — dedi Hayvonlar kasalliklari tashxisi va oziq-ovqat mahsulotlari xavfsizligi davlat ilmiy markazi direktori Bahriddin Tongyoriqov.
Markaz rahbarining ta’kidlashicha, olingan beshta tuproq namunasi 5 kun davomida bakteriologik tekshirilganda kuydirgi kasalligiga xos koloniyalar o‘smagan.
“Ikki bosh sichqonga biosinov qo‘yilib, o‘n kun kuzatildi. Sichqonlarda nojo‘ya o‘zgarishlar yuz bermadi. Ular yorib ko‘rilib, ichki organlari mikroskopik va bakteriologik usullarda tekshirilganda kasallik qo‘zg‘atuvchisi aniqlanmadi”, — dedi markaz direktori Bahriddin Tongyoriqov.
Ma’lumot uchun, ushbu kasallik odamdan odamga yuqmasligi bilan ajralib turadi. Kasallik faqat kasallangan yirik va mayda shoxli qoramollarni so‘yish jarayonida hamda xom go‘sht bilan muloqot jarayonida odamga yuqadi.
Izoh (0)