Сардоба туманидаги Ховотоғ аҳоли яшаш пунктида яшовчи фуқаро Б.А. куйдирги (Сибир яраси) касаллигига гумон қилинган эди. Ҳодиса юз берган ҳудуд тупроғидан олинган намуналарда касаллик қўзғатувчиси аниқланмаган. Бу ҳақда Ветеринария ва чорвачиликни ривожлантириш давлат қўмитаси матбуот котиби Анвар Суюнов «Дарё»га маълум қилди.
Қўмита ахборотида айтилишича, мазкур ҳолатни Ҳайвонлар касалликлари ташхиси ва озиқ-овқат маҳсулотлари хавфсизлиги давлат илмий маркази тўлиқ ўрганиб чиққан.
«Сардоба тумани, ‘Зомин’ маҳалла фуқаролари йиғини, Ховотоғ қишлоғидаги жами 35 та хонадонда парваришланаётган қишлоқ хўжалиги ҳайвонлари 2022 йил режа графиги асосида февраль ойи бошида (жами 241 бош йирик, 231 бош майда шохли ҳайвонлар) куйдирги касаллигига қарши тўлиқ профилактик эмланган. Ҳолатни ўрганиш бўйича ташкил этилган штаб мутахассислари томонидан қорамол сўйилган жойдан олинган тупроқ намуналари ва сўйилган қорамолнинг калла-почаси ҳамда тери қолдиқлари бактериология, паразитология ва микробиология лабораториясида тўлиқ анализ қилинди», — деди Ҳайвонлар касалликлари ташхиси ва озиқ-овқат маҳсулотлари хавфсизлиги давлат илмий маркази директори Баҳриддин Тонгёриқов.
Марказ раҳбарининг таъкидлашича, олинган бешта тупроқ намунаси 5 кун давомида бактериологик текширилганда куйдирги касаллигига хос колониялар ўсмаган.
«Икки бош сичқонга биосинов қўйилиб, ўн кун кузатилди. Сичқонларда ножўя ўзгаришлар юз бермади. Улар ёриб кўрилиб, ички органлари микроскопик ва бактериологик усулларда текширилганда касаллик қўзғатувчиси аниқланмади», — деди марказ директори Баҳриддин Тонгёриқов.
Маълумот учун, ушбу касаллик одамдан одамга юқмаслиги билан ажралиб туради. Касаллик фақат касалланган йирик ва майда шохли қорамолларни сўйиш жараёнида ҳамда хом гўшт билан мулоқот жараёнида одамга юқади.
Изоҳ (0)