Шарқий Африкада жойлашган Танзания давлатининг Линди минтақасида уч киши бурундан қон кетиш билан кечган номаълум касаллик оқибатида вафот этди. Бу ҳақда Citizen маҳаллий нашри хабар бермоқда.
Маҳаллий шифокорлар жами 11 кишида «ғалати» касалликлар аниқланганини маълум қилди: улардан уч нафари вафот этди, икки нафари касалхонага ётқизилди, қолганлари изоляция қилинган. Номаълум касалликка чалиниш ҳолатлари 5 июлдан кейин қайд этила бошланган. Симптомлар нафақат бурундан қон кетиш, балки иситма, бош оғриғи ва чарчоқни ҳам ўз ичига олади.
Танзания президенти Самия Ҳасан Сулухунинг таъкидлашича, касаллик атроф-муҳитнинг бузилиши таъсиридан пайдо бўлгани тахмин қилинмоқда. Баъзи ёввойи турларнинг ҳаёти жиддий равишда бузилган, улар аҳоли пунктларига яқинлашган, натижада бу инсон саломатлигига таъсир қилган.
Mwananchi портали маҳаллий шифокорларга таяниб, 13 киши шундай инфекцияга чалингани ҳолати ҳақида ёзмоқда. Беморларда ўтказилган тестлар Эбола вируслари, Марбург безгаги ва коронавирус учун манфий натижаларни кўрсатган. Касаллар билан алоқада бўлганларнинг барчаси кузатув остида, бироқ уларда ҳеч қандай аломат йўқ.
Апрель ойида Жаҳон соғлиқни сақлаш ташкилоти (ЖССТ) яна бир номаълум касаллик — болаларда гепатитнинг ўрганилмаган шакли авж олганини қайд этганди. 25 июнь ҳолатига ЖССТ дунёда ушбу касалликка чалиниш бўйича 920 та ҳолатни қайд этган, уларнинг ярмидан кўпи Европада, энг катта кўрсаткич Буюк Британияда аниқланган (267 киши).
45 нафар бемор бола жигар трансплантациясига муҳтож бўлган, 18 та ўлим қайд этилган. Касалликнинг манбайи ва патогеннинг юқиш усуллари ўрганилмоқда, ушбу касалликка чалинган беморларда гепатитнинг одатий вируслари (А, Б, C, Д ва Э) аниқланмаган.
Изоҳ (0)