“PSJ” Lionel Messi bilan shartnomani 2024-yilga qadar uzaytirmoqchi.
Argentinalik hujumchining parijliklar bilan shartnomasi 2023-yil yozida o‘z nihoyasiga yetadi, rahbariyat Messiga u bilan bitimni yana bir yilga uzaytirish niyatini ma’lum qilgan, deya xabar beradi Marca.
Leo “PSJ”da qolish yo qolmaslik masalasini Qatarda bo‘lib o‘tadigan Jahon Chempionatidan so‘ng ko‘rib chiqadi.
“PSJ” hujumchi uchun yangi shartnoma borasida hozircha rasmiy taklif bildirmagan. Parijliklar Messi birinchi mavsumdagi moslashish jarayonidan so‘ng, yangi mavsumda yorqinroq o‘yin namoyish etadi, deb hisoblamoqda.
Shuningdek, Messining kelishi parijliklarning moliyaviy ko‘rsatkichlariga ham ta’sir ko‘rsatdi. 2021-yilda klub daromadi 700 millionga yetdi, shu vaqtga qadar jamoa buncha daromad ko‘rmagandi. Lionel kelganidan so‘ng klub 10 yangi homiylar bilan shartnoma imzoladi.
“PSJ” liboslariga ham talab o‘sdi. O‘tgan mavsumda sotilgan klub liboslarning 60 foizida Messining ismi tushirilgan edi. Shunga qaramay, rahbariyatni aynan sport tomoni qiziqtirmoqda.
Argentinalik hujumchi mashg‘ulotlar boshlanishidan bir hafta avval, 5-iyul kuni “PSJ” bazasiga yetib kelgan. Barcha futbolchilar 11-iyuldan boshlab mashg‘ulotlarda ishtirok etishi lozim edi. Messi butun diqqatini yangi mavsumga tayyorlanishga qaratgan.
35 yoshli forvard 2021/22-yilgi mavsum “PSJ” safida barcha musobaqalarda 34 ta o‘yinda ishtirok etib, 11 ta gol va 14 ta golli uzatmaga mualliflik qildi.
Izoh (0)