«ПСЖ» Лионель Месси билан шартномани 2024 йилга қадар узайтирмоқчи.
Аргентиналик ҳужумчининг парижликлар билан шартномаси 2023 йил ёзида ўз ниҳоясига етади, раҳбарият Мессига у билан битимни яна бир йилга узайтириш ниятини маълум қилган, дея хабар беради Marca.
Лео «ПСЖ»да қолиш ё қолмаслик масаласини Қатарда бўлиб ўтадиган Жаҳон Чемпионатидан сўнг кўриб чиқади.
«ПСЖ» ҳужумчи учун янги шартнома борасида ҳозирча расмий таклиф билдирмаган. Парижликлар Месси биринчи мавсумдаги мослашиш жараёнидан сўнг, янги мавсумда ёрқинроқ ўйин намойиш этади, деб ҳисобламоқда.
Шунингдек, Мессининг келиши парижликларнинг молиявий кўрсаткичларига ҳам таъсир кўрсатди. 2021 йилда клуб даромади 700 миллионга етди, шу вақтга қадар жамоа бунча даромад кўрмаганди. Лионель келганидан сўнг клуб 10 янги ҳомийлар билан шартнома имзолади.
«ПСЖ» либосларига ҳам талаб ўсди. Ўтган мавсумда сотилган клуб либосларнинг 60 фоизида Мессининг исми туширилган эди. Шунга қарамай, раҳбариятни айнан спорт томони қизиқтирмоқда.
Аргентиналик ҳужумчи машғулотлар бошланишидан бир ҳафта аввал, 5 июль куни «ПСЖ» базасига етиб келган. Барча футболчилар 11 июлдан бошлаб машғулотларда иштирок этиши лозим эди. Месси бутун диққатини янги мавсумга тайёрланишга қаратган.
35 ёшли форвард 2021/22 йилги мавсум «ПСЖ» сафида барча мусобақаларда 34 та ўйинда иштирок этиб, 11 та гол ва 14 та голли узатмага муаллифлик қилди.
Изоҳ (0)