Toshkentdagi bir qancha ko‘p qavatli turar joy binolarining devorlariga uzoqdan ham ko‘rinib turuvchi yorqin rangdagi reklama vositalari joylashtirilgani kuzatilmoqda. Bunga aholining munosabati haqida Iste’molchilar huquqlarini himoya qilish agentligi ma’lumot berdi.
Ular ayniqsa, poytaxtning markaziy ko‘chalarida bo‘lib, unda dunyodagi eng yirik brendlaridan tortib, mahalliy ishlab chiqaruvchilarning reklamalarigacha uchratish mumkin.
Mamlakatda sanoatning rivojlanishi bilan reklama qurilmalarini baland binolarga joylashtirishga talab ortib bormoqda.
Ko‘p qavatli uylar devorlarining yuzasida devoriy reklamalarni joylashtirish bo‘yicha standartlar mavjud emas.
Bunday reklamalarni joylashtirishning qonuniy shartlari qanday?
Binolar, konstruksiyalar yuzasiga tashqi reklama qurilmalarini o‘rnatish ushbu obyektda yashovchi aholi bilan shartnoma asosida kelishilgan bo‘lishi kerak.
Bunday shartnoma mazkur uylarda yashovchilar bilan umumiy yig‘ilish o‘tkazish orqali tuziladi.
Shundan keyin faqat 50 foizdan ko‘proq ovoz to‘plaganda rozilik beriladi va reklama vositasini joylashtirish huquqiga ega bo‘linadi.
Ko‘p qavatli uy devorlarining yuzasida devoriy reklama konstruksiyalarini o‘zboshimchalik va tegishli shartnomasiz joylashtirishga yo‘l qo‘yilmaydi.
Bundan aholiga qanday foyda bor?
Reklama tarqatuvchi devoriy reklamadan foyda olishi aniq va tushunarli.
Aholi esa tashqi reklamani joylashtirganligi uchun to‘lanadigan pul hisobidan uyning tom qismi, kirish yo‘laklari, uy atrofini obodonlashtirishi mumkin.
Qonunga muvofiq, faqat aholi roziligidan so‘ng ko‘p qavatli uy devorlariga reklama joylashtiriladi.
Shuningdek, ular tashqi reklamani joylashtirganlik uchun to‘lanadigan pul tushumlari to‘g‘risida xabardor bo‘lishi, ularning xarajatlari to‘g‘risida hisobot talab qilishi mumkin.
Izoh (0)