Toshkent shahrida erkak va ayol mayda bezorilik qilib, ichki ishlar organlari xodimining qonuniy talablarini bajarmaganligi uchun 15 sutkaga qamaldi. Bu haqda Toshkent shahar sudi matbuot xizmati “Daryo”ga xabar berdi.
Ma’lumotga ko‘ra, 12-iyul kuni jinoyat ishlari bo‘yicha Yakkasaroy tuman sudida, ochiq sud majlisida ikki nafar huquqbuzarga nisbatan ma’muriy ish ko‘rib chiqilgan.
“Huquqbuzar yigit va qiz 2022-yil 9-iyul kuni soat 21:30 larda Toshkent shahar, Yakkasaroy tumani, Nukus ko‘chasida bo‘la turib, mast holda jamiyatda yurish-turish qoidalarini qasddan mensimasdan, Lacetti rusumli avtomashinasi lyuk qismidan tana va bosh qismlarini chiqarib olishadi. Jamoat tartibi va fuqarolarning osoyishtaligini buzishgan hamda IIB xodimlari tomonidan Yakkasaroy tumani Kichik Beshyog‘och va Nukus chorrahasida avtomashina to‘xtatilib, ularning shaxslarini aniqlash maqsadida IIB binosiga taklif qilishganida, yigit IIB binosiga borishdan bosh tortib, IIB xodimlarining qonuniy talablarini bajarmagan”, — deyiladi Toshkent shahar sudi matbuot xizmati axborotida.
Sudning qaroriga ko‘ra, huquqbuzar yigit Ma’muriy javobgarlik to‘g‘risidagi kodeksning 183-moddasi (mayda bezorilik) va 194-moddasi (ichki ishlar organlari xodimining qonuniy talablarini bajarmaslik) 1-qismida nazarda tutilgan ma’muriy huquqbuzarliklarni sodir qilgan deb topildi. Unga 15 sutka ma’muriy qamoq jazosi va bazaviy hisoblash miqdorining 1 baravari miqdorida, ya’ni 300 ming so‘m ma’muriy jarima jazosi tayinlangan.
Huquqbuzar qiz esa Ma’muriy javobgarlik to‘g‘risidagi kodeksning 183-moddasi (mayda bezorilik)da nazarda tutilgan ma’muriy huquqbuzarlikni sodir qilgan deb topildi. Unga 15 sutka ma’muriy qamoq jazosi tayinlangan.
Qo‘shimcha qilinishicha, qarordan norozi tomon shu sud orqali Toshkent shahar sudi jinoyat ishlari bo‘yicha sudlov hay’ati apellyatsiya instansiyasiga yigirma sutka ichida shikoyat berishi yoki protest keltirishi mumkin.
Izoh (0)