Тошкент шаҳрида эркак ва аёл майда безорилик қилиб, ички ишлар органлари ходимининг қонуний талабларини бажармаганлиги учун 15 суткага қамалди. Бу ҳақда Тошкент шаҳар суди матбуот хизмати «Дарё»га хабар берди.
Маълумотга кўра, 12 июль куни жиноят ишлари бўйича Яккасарой туман судида, очиқ суд мажлисида икки нафар ҳуқуқбузарга нисбатан маъмурий иш кўриб чиқилган.
«Ҳуқуқбузар йигит ва қиз 2022 йил 9 июль куни соат 21:30 ларда Тошкент шаҳар, Яккасарой тумани, Нукус кўчасида бўла туриб, маст ҳолда жамиятда юриш-туриш қоидаларини қасддан менсимасдан, Lacetti русумли автомашинаси люк қисмидан тана ва бош қисмларини чиқариб олишади. Жамоат тартиби ва фуқароларнинг осойишталигини бузишган ҳамда ИИБ ходимлари томонидан Яккасарой тумани Кичик Бешёғоч ва Нукус чорраҳасида автомашина тўхтатилиб, уларнинг шахсларини аниқлаш мақсадида ИИБ биносига таклиф қилишганида, йигит ИИБ биносига боришдан бош тортиб, ИИБ ходимларининг қонуний талабларини бажармаган», — дейилади Тошкент шаҳар суди матбуот хизмати ахборотида.
Суднинг қарорига кўра, ҳуқуқбузар йигит Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси (ички ишлар органлари ходимининг қонуний талабларини бажармаслик) 1-қисмида назарда тутилган маъмурий ҳуқуқбузарликларни содир қилган деб топилди. Унга 15 сутка маъмурий қамоқ жазоси ва базавий ҳисоблаш миқдорининг 1 баравари миқдорида, яъни 300 минг сўм маъмурий жарима жазоси тайинланган.
Ҳуқуқбузар қиз эса Маъмурий жавобгарлик тўғрисидаги кодекснинг 183-моддаси (майда безорилик)да назарда тутилган маъмурий ҳуқуқбузарликни содир қилган деб топилди. Унга 15 сутка маъмурий қамоқ жазоси тайинланган.
Қўшимча қилинишича, қарордан норози томон шу суд орқали Тошкент шаҳар суди жиноят ишлари бўйича судлов ҳайъати апелляция инстанциясига йигирма сутка ичида шикоят бериши ёки протест келтириши мумкин.
Изоҳ (0)