Samarqand viloyatining Toyloq tumanida yashovchi kelin o‘z joniga qasd qilgani to‘g‘risida xabar qilingandi. Viloyat Prokuraturasi holat yuzasidan olib borilgan tekshiruv jarayoni haqida ma’lumot berdi.
Aniqlanishicha, 2022-yil 27-iyun kuni soat taxminan 04:30 larda Toyloq tumani “Bog‘izag‘on” mahallasida yashagan 31 yoshli kelin I.G. yashash uyi mehmonxonasida kiyim ilgichga ayollar ro‘moli bilan o‘zini o‘zi osib joniga qasd qilgan.
Holat yuzasidan o‘tkazilgan dastlabki sud-tibbiy ekspertiza xulosasiga ko‘ra, marhumning o‘limi osilishda bo‘yin a’zolarini sirtmoq bilan qisilishi natijasida yuzaga kelgan mexanik asfiksiyadan kelib chiqqani, marhumaning tanasida yengil tan jarohatlari mavjudligi ko‘rsatilgan.
Holat yuzasidan tuman prokuraturasi tomonidan tergovga qadar tekshiruv harakatlari o‘tkazilib, marhuma G.I.ning turmush o‘rtog‘i X.O.ga nisbatan Jinoyat kodeksining 103-moddasi (o‘zini o‘zi o‘ldirish darajasiga yetkazish) bilan jinoyat ishi qo‘zg‘atilgan. Hozirda tergov harakatlari olib borilmoqda.
Dastlabki tergov ustidan Bosh prokuratura tomonidan nazorat o‘rnatilgan.
Ma’lumot uchun, G.I. 1989-yilda tug‘ilgan O.X. bilan 2019-yilda qonuniy nikohdan o‘tib, birga yashab kelgan. Turmushlari davomida 2 nafar 2019 va 2021-yilda tug‘ilgan farzandi bor.
Izoh (0)