Andijon viloyati Adliya boshqarmasi “Daryo”da e’lon qilingan “Andijon hokimi prezident qarori ijrosini ta’minlash bo‘yicha qaror qabul qildi. Qarorida vazirlarga, Toshkent shahar hokimiga topshiriq berdi”, sarlavhali maqolaga munosabat bildirdi.
“Mazkur maqolada Andijon viloyat hokimining vazirlar va hokimlarga topshiriqlar berganiga, shuningdek, qaror adliya organlari tomonidan huquqiy ekspertizadan o‘tkazilmaganiga e’tibor qaratilgan. Viloyat hokimi qarorlarida odatda ijrochilarga tushunarli bo‘lishi uchun prezident qarorida ko‘rsatilgan vazifalar matni takror ma’lumot uchun ko‘rsatib o‘tiladi. Bu boshqa viloyatlarda ham an’anaga aylangan amaliyot.
Vazirliklarga topshiriqlar berilgan degan talqinni ham, yuqoridagi hokim qarorining tegishli bandini oxirigacha o‘qib chiqib, aniqlab olish mumkin. Prezident qaroridagi topshiriqlar ma’lumot va ijro uchun qabul qilingan. Shuningdek, viloyat hokimi qarori bilan ilovalar tasdiqlanmagan, balki prezident qarorida tasdiqlanganligi inobatga olingan”, — deyiladi viloyat Adliya boshqarmasi munosabatida.
Boshqarma mas’ullari viloyat hokimi qarori huquqiy ekspertizadan o‘tkazilmaydi, demoqda.
“Hududiy adliya organlari tomonidan qonunchilikka muvofiq uch turdagi qarorlar — yer munosabatlariga doir, normativ tusdagi qarorlar va ko‘chmas mulkni buzish bilan bog‘liq qarorlar ekspertizasi o‘tkaziladi. Andijon viloyati hokimining mazkur qarori yuqoridagi qarorlar toifasiga kirmaganligi sababli adliya boshqarmasidan huquqiy ekspertizadan o‘tkazilmaydi. O‘zi har bir hokim qarori adliya organlaridan huquqiy ekspertizadan o‘tadi degan yanglish fikrlar mavjud, lekin qonunchilik talablarida bu qoida yo‘q. Hokimlik yuriskonsulti bu ishni bajaradi”, — deyiladi boshqarma axborot xizmati bergan munosabatda.
Avvalroq Andijon viloyati hokimligi mazkur maqolaga munosabat bildirib, “prezident qarori matnini hokim qarorida so‘zma-so‘z keltirib, uning mazmunini to‘liq yetkazish maqsad qilingan”, degandi.
Izoh (0)