“Humo” xokkey klubi Qozog‘iston chempionatiga qaytdi

O‘zbekiston xokkey jamoasi “Humo” yangi mavsumda “Pro Hokei Ligasy” chempionatida ishtirok etadi. Bu haqida klub rasmiy sayti ma’lum qildi.

O‘zbekiston xokkey federatsiyasi kelishuvga erishgan. Tez orada shartnoma va boshqa me’yoriy hujjatlar imzolanadi.

“Humo”ning qaytishi chempionatimizga ijobiy ta’sir ko‘rsatadi. Sog‘lom raqobat hech kimga zarar keltirmaydi. Toshkent klubi o‘zining birinchi mavsumidan so‘ng ham “Pro Hokei Ligasy” ishtirokchisi sifatida qolishni istagandi, ammo Covid cheklovlari bunga xalaqit berdi. Umid qilamizki, endi hammasi yaxshi bo‘ladi va “Humo”ning qaytishi o‘zaro rivojlanishga xizmat qiladi. Balki bu voqea boshqa xorijiy jamoalarning ham Qozog‘iston chempionatiga kirishiga turtki bo‘lar. Qayd etib o‘tishni istardimki, “Humo” avgust oyining ikkinchi yarmiga belgilangan Qozog‘iston Kubogida ham ishtirok etishni maqsad qilgan.

Andrey Sachuk, QXL ijrochi direktori   

“Humo” yana o‘yinga qaytdi. Klub koronavirus pandemiyasi sababli sodir bo‘lgan ikki yillik tanaffusdan so‘ng “Pro Hokei Ligasy”da ishtirokini qayta tiklaydi. Bu yangilik O‘zbekiston va Qozog‘iston xokkey muxlislarini xursand qiladi, deb o‘ylaymiz. Qozog‘iston chempionatida kuchli va mahoratli jamoalar yig‘ilgan. Umuman chempionatning saviyasi ancha yuqori. “Humo”ning turnirdagi ishtiroki O‘zbekistonda xokkeyni yanada ommalashtirish va rivojlantirishga xizmat qilishiga ishonaman.

Bahodir G‘ofurov, O‘zbekiston xokkey federatsiyasi birinchi vitse-prezidenti