Халқаро энергетика агентлиги (IEA) раҳбарининг сўзларига кўра, энергия таъминотидаги юзага келаётган тақчиллик, энергия ва ёқилғи нархларининг ошиши ҳали узоқ давом этиши мумкин. Бу ҳақда Bloomberg хабар берди.
Дунё ҳали ҳеч қачон бундай йирик энергия инқирозига гувоҳ бўлмаган. Бу вазиятда энг ёмони ҳали олдинда бўлиши мумкин, — деди IEA ижрочи директори Фотиҳ Бирол.
Биролнинг айтишича, нархларнинг кўтарилиши бутун дунё бўйлаб газ бакларини тўлдириш, уйларни иситиш ва саноатни энергия билан таъминлаш харажатларини ошишига сабаб бўлган.
Бу эса инфляция босимини кучайтириб, Африкадан Шри-Ланкагача бўлган ҳудудларда норозиликларга олиб келмоқда.
Шу билан бирга, нефть ва газ етишмовчилиги Европа учун ҳам бошқа минтақалар учун ҳам йирик муаммо бўлиб қолмоқда.
Европада бу қиш жуда қийин ўтади. Бу эса глобал иқтисодиёт учун жиддий оқибатларга олиб келиши мумкин, — деди Бирол.
АҚШ энергетика вазири Женнифер Гранхолмга кўра, глобал миқёсда тоза энергияга ўтиш энг катта тинчлик режаси бўлиши мумкин.
IEA маълумотларига кўра, Хитой қуёш энергияси учун глобал таъминот занжирларининг қарийб 80 фоизини назорат қилади. Бу кўрсаткич 2025 йилга келиб 95 фоизга кўтарилиши кутилмоқда.
Мустақил тоза энергия таъминот занжирларини қуриш орқали биз ўз иқтисодиётимизни кейинги инқироз зарбаларидан ҳимоя қила оламиз, — деди Австралиянинг иқлим ўзгариши ва энергетика вазири Крис Боуен.
Аввалроқ дунё 2025 йилгача қуёш панелларини ишлаб чиқаришда бутунлай Хитойга таяниши ҳақида хабар берилганди.
Изоҳ (0)