Yevropa Ittifoqida retsessiya ehtimoli 45 foizga oshdi — Bloomberg

Yevropada retsessiya xavfi gaz taqchilligi va inflyatsiyaning rekord darajada yuqoriligi sabab ortib bormoqda. Bu haqda Bloomberg xabar berdi.

Retsessiya — vaqtinchalik iqtisodiy pasayish davri bo‘lib, bu davrda savdo va sanoat faoliyati qisqaradi, odatda ikki chorakda yalpi ichki mahsulotning pasayishi bilan belgilanadi.

Iqtisodiy pasayish ehtimoli ekspertlar tomonidan 45 foizga baholanmoqda.

Shu bilan birga, ularning aksariyati Germaniya birinchilardan bo‘lib ishlab chiqarish qisqarishiga duch kelishini kutmoqda.

Biz retsessiyaga joriy neft embargosi va ko‘tarilgan xomashyo narxlari sabab bo‘ladi, deb taxmin qilyapmiz. Masalan, Germaniya iqtisodiyoti allaqachon sekinlashmoqda, — dedi Rabobank tahlilchisi Erik-Yan van Harn.

Yevropadagi iste’mol narxlari may oyida 8,1 foizga ko‘tarildi. Shundan so‘ng iyun oyida u yillik 8,6 foizga oshib, tarixdagi eng yuqori ko‘rsatkichga aylandi.

Shu bilan birga, ekspertlar Yevropa Markaziy banki stavkani joriy yilning oxirigacha yiliga 0,75 foizga, kelgusi yilning mart oyida esa 1,25 foizga oshirishini kutmoqda.

Yevropa joriy yilning ikkinchi yarmida yengil retsessiyaga kirishi mumkin, buning natijasida Markaziy bank asta-sekin stavkani oshiradi, — dedi TD Securities iqtisodchilari.

Avvalroq ko‘plab yirik iqtisodiyotli davlatlar kelasi yilda retsessiyaga uchrashi kutilayotgani haqida xabar berilgandi.