«Ўзбекистон 24» телеканалида эфирга узатилган «Менимча» кўрсатуви бошловчиси Хайрулла Нуриддинов Қорақалпоғистондаги вазият борасида гапирар экан, мамлакатдаги камчиликларни танқид қилувчи ижтимоий тармоқ вакилларини танқид қилди.
Ўзбекистон жамиятида битта тоифа мавжуд. Ўша тоифа ижтимоий тармоқда ўтириб олиб, битта энсақотар гапни бот-бот айтиб туради. Шуниси аҳамиятлики, ўша қатламнинг услубияти, дастхати ҳеч қачон ўзгармайди, доим бир хил. Ўша энсақотар гапни шу қатлам доим айтиб келган.
Ўша тоифа учун аслида мамлакатнинг тақдири халқнинг қисмати икки пулга қиммат масала. Бугунги Ўзбекистон аввалгисидан осмон-у заминдек фарқ қилса ҳам, ўша гапидан воз кечмайди ўша тоифа.
Гап нима ҳақида кетяпти? Гап шундаки, аввал ҳам, бугун ҳам Ўзбекистонда мабодо битта муаммо чиқса, қайсидир маҳаллада свет ўчиб қоладими, кимнингдир очкўзлиги сабаб маҳсулот қимматлашадими ёки қайсидир ноинсоф мутасаддининг айби билан қайсидир ташкилотда ойлик маоши кечикадими, хуллас, нимаики муаммо чиқса, бояги тоифа ижтимоий тармоқдаги туйнугида дарров заҳар сочади. «Зато осмонимиз мусаффо-да», деб кесатади. «Зато осмонимиз мусаффо-ку, шунинг ўзига овунамиз-да энди», деб заҳарханда қилади.
Ўша кесатиқ гапни эшитганимда нуқул айтгим келади – «Ҳой, унақа деманг, осмон мусаффолиги, яъни тинчлик худди нонга, онамизга, динимизга ўхшаган муқаддас тушунча. Бу тушунчани мазах қилиб бўлмайди, ёмон бўлади», дегим келаверарди.
Бу билан ҳазиллашманг, бу тушунча билан ўйнашманг. Агар Худо кўрсатмасин, ўша сизнинг кесатиғингизга сабаб бўлаётган, нишон бўлаётган осмон мусаффолиги, тинчлик забун кўрса, додингизни кимга айтасиз, дегиларим келарди. Лекин бу гапим билан ўзим ҳам ёмон ниятни тилга олаётган бўлиб чиқаман-ку, деб тилимни тизгинга солгандим. Бугун айтишга жазм қилдим шу гапни, — дейди журналист Хайрулла Нуриддинов.
Изоҳ (0)