Bosh prokuratura tomonidan o‘tkazilgan o‘rganishda 2022-yil Samarqand viloyati bo‘yicha 58 ta arxeologiya merosi obyektlari buzilishi yoki yo‘q qilib yuborilishi oqibatida davlat manfaatlariga 1 trillion 57,7 milliard so‘mlik zarar yetkazilganligi aniqlangan. Bu haqda Xalq deputatlari Samarqand viloyati kengashining oltmish yettinchi sessiyasida viloyat Madaniy meros boshqarmasi boshlig‘i Botir Shaymatov ma’lum qildi.
“Arxeologiya merosi obyektlarini muhofaza qilish va ulardan foydalanish to‘g‘risidagi O‘zbekiston Respublikasi qonunining ijrosini ta’minlash maqsadida madaniy meros boshqarmasi hamda viloyat prokuraturasi hamkorligida arxeologiya madaniy meros obyektlari ustidan davlat nazoratini o‘tkazish maqsadida o‘rganishlar o‘tkazildi va aniqlangan holatlar yuzasidan sud organiga hujjatlar taqdim yetildi.
2022-yil boshidan bugungi kunga qadar viloyatdagi turizm infratuzilmasi va yondosh infratuzilmani qurish, rekonstruksiya qilish, kengaytirish va madaniy-ko‘ngilochar infratuzilmalarni rivojlantirish bo‘yicha loyihalar ro‘yxatiga 12 ta madaniy meros obyektlari kiritilgan. Registon, Shohi-Zinda majmuasi, Bibixonim, Chorsu savdo gumbazi, Ulug‘bek rasadxonasi va Qo‘shhovuz masjidi madaniy meros obyektlarida konservatsiya va restavratsiya ishlari boshlangan.
Xuddi, shuningdek, Shohizinda majmuasining Qo‘sh gumbaz maqbarasining gumbaz qismida ta’mirlash ishlarini amalga oshirish uchun havozalar o‘rnatildi va majmuadagi sakkiz qirrali maqbara ‘Noma’lum’, Tuman oqa maqbaralarida Vaqf xayriya jamoat fondi hisobidan ta’mirlash ishlari olib borilmoqda”, — deydi Botir Shaymatov.
Aytilishicha, YUNESKO Umumjahon merosi ro‘yxatiga kiritilgan Samarqand shahrining tarixiy va muhofaza himoya zonalarining chegaralari to‘g‘risida axborot beruvchi 55 ta ko‘rsatkich Samarqand shahrining tarixiy hududi bo‘ylab o‘rnatilgan.
“2022-yilning buguni kuniga qadar oltita arxeologik tadqiqot ishlari olib borilgan bo‘lib, 300 tadan ziyod topilmalar topilgan. Topilmalar Samarqand arxeologiya institutida saqlanib, qayta ishlanmoqda. Mazkur arxeologik tadqiqot ishlarida 42 nafar fuqaroning bandligi ta’minlangan. Arxeologiya madaniy meros obyektlarining atrofini maxsus sim to‘siq bilan o‘rab olish yuzasidan 123 ta arxeologiya madaniy meros obyektlarining ro‘yxati shakllantirilib, 2022—2025 yillar davomida bosqichma-bosqich amalga oshirilishi rejalashtirildi”, — deydi mas’ul.
Izoh (0)