Бош прокуратура томонидан ўтказилган ўрганишда 2022 йил Самарқанд вилояти бўйича 58 та археология мероси объектлари бузилиши ёки йўқ қилиб юборилиши оқибатида давлат манфаатларига 1 триллион 57,7 миллиард сўмлик зарар етказилганлиги аниқланган. Бу ҳақда Халқ депутатлари Самарқанд вилояти кенгашининг олтмиш еттинчи сессиясида вилоят Маданий мерос бошқармаси бошлиғи Ботир Шайматов маълум қилди.
«Археология мероси объектларини муҳофаза қилиш ва улардан фойдаланиш тўғрисидаги Ўзбекистон Республикаси қонунининг ижросини таъминлаш мақсадида маданий мерос бошқармаси ҳамда вилоят прокуратураси ҳамкорлигида археология маданий мерос объектлари устидан давлат назоратини ўтказиш мақсадида ўрганишлар ўтказилди ва аниқланган ҳолатлар юзасидан суд органига ҳужжатлар тақдим етилди.
2022 йил бошидан бугунги кунга қадар вилоятдаги туризм инфратузилмаси ва ёндош инфратузилмани қуриш, реконструкция қилиш, кенгайтириш ва маданий-кўнгилочар инфратузилмаларни ривожлантириш бўйича лойиҳалар рўйхатига 12 та маданий мерос объектлари киритилган. Регистон, Шоҳи-Зинда мажмуаси, Бибихоним, Чорсу савдо гумбази, Улуғбек расадхонаси ва Қўшҳовуз масжиди маданий мерос объектларида консервация ва реставрация ишлари бошланган.
Худди, шунингдек, Шоҳизинда мажмуасининг Қўш гумбаз мақбарасининг гумбаз қисмида таъмирлаш ишларини амалга ошириш учун ҳавозалар ўрнатилди ва мажмуадаги саккиз қиррали мақбара ‘Номаълум’, Туман оқа мақбараларида Вақф хайрия жамоат фонди ҳисобидан таъмирлаш ишлари олиб борилмоқда», — дейди Ботир Шайматов.
Айтилишича, ЮНЕСКО Умумжаҳон мероси рўйхатига киритилган Самарқанд шаҳрининг тарихий ва муҳофаза ҳимоя зоналарининг чегаралари тўғрисида ахборот берувчи 55 та кўрсаткич Самарқанд шаҳрининг тарихий ҳудуди бўйлаб ўрнатилган.
«2022 йилнинг бугуни кунига қадар олтита археологик тадқиқот ишлари олиб борилган бўлиб, 300 тадан зиёд топилмалар топилган. Топилмалар Самарқанд археология институтида сақланиб, қайта ишланмоқда. Мазкур археологик тадқиқот ишларида 42 нафар фуқаронинг бандлиги таъминланган. Археология маданий мерос объектларининг атрофини махсус сим тўсиқ билан ўраб олиш юзасидан 123 та археология маданий мерос объектларининг рўйхати шакллантирилиб, 2022—2025 йиллар давомида босқичма-босқич амалга оширилиши режалаштирилди», — дейди масъул.
Изоҳ (0)