Фарғона аэропортидаги чегара-божхона пости бошлиғи белгиланган тартибга зид равишда божхона назоратидан ўтказиш билан шуғуллангани учун қўлга олинди. Бу ҳақда ДХХ матбуот хизмати хабар берди.
Маълум қилинишича, Фарғона халқаро аэропорти чегара-божхона пости бошлиғи вазифасини бажарувчи А.С. ўзининг бўйсунувида бўлган ходим Х.Ж. ва маҳаллий фуқаролар билан келишган ҳолда, моддий манфаатдорлик эвазига, хориждан келаётган йўловчилар номига расмийлаштирилиб, олиб келинган жуда кўп миқдордаги товар қимматликларни белгиланган тартибга зид равишда божхона назоратидан ўтказиш билан шуғулланган.
ДХХнинг Фарғона вилояти бўйича бошқармаси ходимлари томонидан ўтказилган тезкор тадбирда Домодедово—Фарғона йўналишида Москва шаҳридан учиб келган 4 нафар йўловчи номига расмийлаштирилиб, олиб келинган, умумий қиймати 276,6 миллион сўмлик товар қимматликларни қабул қилиб олган вақтида фуқаролар А.Н. ва Н.А. қўлга олинган. Шунингдек, мазкур товарлар Фарғона шаҳрида яшовчи, тадбиркор Р.Б.га тегишли экани маълум бўлиб, у ҳам ушланган.
Терговга қадар текширув давомида аниқланишича, Фарғона халқаро аэропорти чегара-божхона пости ходими Х.Ж. ўзининг бошлиғи А.С.нинг кўрсатмасига асосан ушбу товар қимматликларни белгиланган тартибга зид равишда божхона назоратидан ўтказиб юборган.
Ҳозирда ҳолат юзасидан ДХХ Фарғона вилояти бўйича бошқармаси Тергов бўлими томонидан А.С. ва бошқаларга нисбатан жиноят иши қўзғатилган.
Изоҳ (0)