Nukusda sodir bo‘lgan ommaviy tartibsizliklar natijasida harbiy avtobus va aholiga tegishli bo‘lgan katta mashinalar yondirilgan. Qoraqalpog‘iston Respublikasi komendaturasining xabar berishicha, Nukusdagi ommaviy tartibsizliklarda oldindan puxta tayyorgarlik ko‘rgan, turli harbiy taktikalardan xabardor guruhlar ishtirok etgani bir qancha dalillar bilan ochiqlanib bormoqda. “Daryo” muxbirlari Qoraqalpog‘istonga qilgan xizmat safari davomida shahardan fotoreportaj tayyorladi.
O‘sha kuni tunda harbiy xizmatchilarni olib ketayotgan 2 ta maxsus avtobusga aniq taktika orqali hujum uyushtirilgan. Voqea ishtirokchisi bo‘lgan harbiylar bilan suhbatda aytilishicha, ko‘chalarda dastlab bir nechta mashina balonlari yoqilib, barrikada hosil qilingan va yo‘llar to‘silgan. Barrikadani aylanib o‘tish uchun avtobuslar sekinlashganda qorong‘u va pana joydan bir guruh shaxslar otilib chiqib, og‘ir toshlar bilan oynalarni sindirgan.
Shundan so‘ng, singan joydan qo‘lbola yasalgan “Molotov kokteyli” otilgan. Natijada avtobus ichida yong‘in kelib chiqqan (suratda ham avtobus ichi qop-qora bo‘lib ketganini ko‘rish mumkin). So‘nggi bosqichda avtobusga oldindan tayyorlab qo‘yilgan chelaklarda benzin sepilgan. Katta ehtimol bilan bundan maqsad, avtobus ichidagi yong‘inni katta alangaga aylantirish va bu orqali yoki ichkaridagi harbiylarni tiriklay yoqib yuborish, yoki yong‘indan qochib, eshiklarni ochib tashqariga chiqqanda ularni asir olish bo‘lgan.
Haydovchining chaqqonligi sabab chelaklarda sepilgan benzin avtobus ichiga emas, balon atrofiga tekkan (rasmda benzin dog‘i ko‘rinib turibdi). Avtobus ichidagi yong‘inni esa bir amallab o‘chirib olishgan, ammo bu jarayonda bir qancha harbiy xizmatchilar turli darajadagi og‘ir va yengil kuyish tan jarohatini olgan. Chunki kimlarningdir kiyimlari ham yonib ketgan. Allohga shukrki, hech kim vafot etmagan.
Hozirda ushbu holat bo‘yicha ham tergov jarayonlari olib borilmoqda.
Shuningdek, rasmlarda tartibbuzarlar tomonidan yoqib yuborilgan tinch aholi va tadbirkorlarning transportlarini ham ko‘rish mumkin.
Iyul oyining dastlabki kunlarida sodir bo‘lgan voqealardan keyin hozirda Nukusda hayot odatiy tarzda davom etmoqda. Eslatib o‘tamiz, prezident farmoni bilan Qoraqalpog‘istonda 3-iyuldan 2-avgustgacha favqulodda holat joriy etilib, bir qator chora va vaqtinchalik cheklovlar o‘rnatildi. Favqulodda holat amal qilishi davrida O‘zbekiston Mudofaa vazirligi kuchlari va vositalari qo‘shimcha ravishda jalb etilishi belgilandi.
3-iyul kuni Shavkat Mirziyoyev yana Nukusga borib, videoselektor o‘tkazdi. Tuman hokimlari va huquqni muhofaza qiluvchi organlar rahbarlari fuqarolarning xavfsizligini ta’minlash, qonuniylik va huquq-tartibotni mustahkamlash bo‘yicha ko‘rilayotgan chora-tadbirlar yuzasidan axborot bergan. Davlat rahbarining murojaatidan keyin vaziyat barqarorlashgani, hayot o‘z maromiga qaytayotgani ma’lum qilindi.
Qoraqalpog‘iston Respublikasi hududi komendanti, general mayor Rustam Jo‘rayev Qoraqalpog‘istondagi tartibsizliklarda 14 nafar fuqaro tartibsizliklar sodir bo‘lgan joyda turli darajadagi jarohatlardan vafot etgani, ulardan 13 nafari alkogol va giyohvand moddalar ta’sirida bo‘lganini ma’lum qildi. Shuningdek, xizmat burchini bajargan huquq-tartibot organlari xodimlaridan ham 4 nafari halok bo‘lgan.
Hozirda bolalar bog‘chalari, bozorlar, aholini ish bilan ta’minlash markazlari hamda boshqa jamoat joylari odatiy tartibda ish olib bormoqda. Suratlarda Nukus tumani, “Sovyonok” davlat xususiy sheriklik asosida nodavlat maktabgacha ta’lim muassasasi hamda Nukus shahridagi Monomarkazdagi odatiy hayot tarzi.
Izoh (0)