Ochilganiga 96 yil bo‘lgan Toshkent hayvonot bog‘iga birinchi marta oq bengal yo‘lbarsi olib kelindi. Bu turdagi jonivor tabiatda noyob bo‘lgani bois “Daryo” hayvonot bog‘idan reportaj tayyorladi.
Toshkent hayvonot bog‘ining Yirtqichlar bo‘limi mudiri Nodir Bahromov oq bengal yo‘lbarsining o‘ziga xos xususiyatlari haqida gapirib berdi.
“Hayvonot bog‘imizga keltirilgan oq bengal yo‘lbarsi erkak va uning tug‘ilganiga 10 oy bo‘lgan. Laqabini Fufuna deb qo‘ydik. Bir kunlik iste’moli uchun 3-4 kilogramm mol go‘shti, bitta tirik o‘rdak yoki quyon, tovuq tuxumi beramiz. Oq bengal yo‘lbarsi tabiatda juda kam uchraydi. Chunki u tabiatda o‘zini erkin his qila olmaydi. Ya’ni rangi oq bo‘lgani uchun o‘zini qamishzor ichida berkita olmaydi va ov qilishga qiynaladi. Qolaversa, brakonyerlarga osongina o‘lja bo‘ladi. Shuning uchun oq yo‘lbarslar va oq sherlar ko‘pincha hayvonot bog‘lari, qo‘riqxona yoki sirklarda boqiladi.
Uni hattoki ona yo‘lbars ham boqmaydi. Sababi 2-3 yoshli bolasini alohida chiqarib yuborgani bilan, oq yo‘lbars o‘zi yashab keta olmaydi. O‘ljasining ko‘ziga ko‘ringani, kunduzi quyoshda ko‘zi yaxshi ko‘rmasligi unga pand beradi. Bunday jonivorlarni xuddiki tabiatda foydasi bo‘lmagani uchun ham ona yo‘lbarslar boqmaydi”, — dedi mutaxassis.
Ma’lumotlarga ko‘ra, oq rangli bengal yo‘lbarslari Hindistonda keng tarqalgan. Ular tabiatda 10-12 yil, hayvonot bog‘larida 20-25 yilgacha yashaydi. Nodir Bahromovning aytishicha, bunday yo‘lbarslar boshqa turdagi yo‘lbarslardan nozikroq ekani bilan ajralib turadi.
“Bular ov qilganda boshqa yo‘lbarslarga nisbatan sal nimjonroq bo‘ladi. Oq bengal yo‘lbarslari kasallikka ham moyilroq. Shuning uchun boshqa yo‘lbarslarga nisbatan bularga veterinarlar ko‘proq e’tibor beradi. Hayvonot bog‘i ochilganiga 96 yil bo‘ldi va oq rangli bengal yo‘lbarsi shu paytgacha olib kelinmagandi. Sababi oq yo‘lbarslarni hayvonot bog‘larida boqish oxirgi 20-30 yil ichida rivojlandi”, — dedi bog‘ xodimi.
Avvalroq “Daryo” nashrida Toshkent hayvonot bog‘idagi Zuzu laqabli ayiq haqida reportaj e’lon qilingandi.