May oyida Xitoy Rossiyadan o‘tgan yilning shu davriga nisbatan 55 foizga ko‘p neft eksport qilib, rekord darajani qayd etdi. Bu haqda Reuters xabar berdi.
Xitoy kompaniyalari Rossiya neftini sanksiyalar fonida arzonlashgani sababli sotib olishni boshlagan.
Xitoy Bosh bojxona boshqarmasi ma’lumotlariga ko‘ra, may oyida Rossiya neftining importi deyarli 8,42 mln tonnaga yetgan. Bu kuniga taxminan 1,98 mln barrelga to‘g‘ri keladi.
Saudiya Arabistoni Xitoy tomonidan sotib olingan neft hajmi bo‘yicha ikkinchi o‘rinni egalladi. Undan yetkazib berish o‘tgan yilning shu davriga nisbatan 9 foizga oshib, 7,82 mln tonnaga yetgan.
Xitoy, shuningdek, Erondan 260 ming tonna, Malayziya va Braziliyadan yana 2,2 mln tonnadan xom neft import qilgan.
Xitoyning umumiy xom neft importi may oyida deyarli 12 foizga oshib, kuniga 10,8 mln barrelni tashkil etdi.
Bundan tashqari, Xitoy Rossiyadan suyultirilgan gaz (LNG) importini oshirdi. May oyida u deyarli 400 ming tonnaga yetdi, bu o‘tgan yilga nisbatan 56 foizga ko‘pdir.
2022-yilning dastlabki besh oyida Rossiyadan LNG importi 22 foizga o‘sib, 1,84 mln tonnani tashkil qildi. Ta’minot asosan Uzoq Sharqdagi Saxalin-2 loyihasi va Arktikadagi Yamal LNG tomonidan ta’minlangan.
Avvalroq Eron Rossiya bilan raqobat sabab Xitoy uchun neft narxini pasaytirgani haqida xabar berilgandi.
Izoh (0)