Aleksandr Lukashenko Ukraina Qurolli kuchlarini Belarusdagi harbiy obyektlarga raketa uchirayotganlikda aybladi. Bir necha kun oldin o‘qqa tutishga urinish bo‘lgan, biroq barcha raketalar tutib olingan, dedi u mamlakat Mustaqillik kuni munosabati bilan o‘tkazilgan tantanali yig‘ilishda.
“Bizni provokatsiya qilishyapti... Uch kun oldin, balki undan avvalroq, ular Ukraina hududidan Belarus hududidagi harbiy obyektlarga zarba berishga harakat qildi. Ammo, xayriyatki, ‘Pantsir’ zenit tizimlari Ukraina Qurolli kuchlari tomonidan uchirilgan barcha raketalarni tutib olishga muvaffaq bo‘ldi”, — dedi Lukashenko. U so‘zlari uchun hech qanday dalil keltirmadi.
Lukashenkoning ta’kidlashicha, u Belarus harbiylariga Minsk raqiblarining poytaxtlaridagi qaror qabul qilish markazlarini “nishonga olish” buyrug‘ini bergan. Lukashenko agar ular Gomelga, Mozir neftni qayta ishlash zavodiga, Lunints aerodromiga yoki Brestga zarba berishga jur’at etsa, “bir zumda javob qaytariladi”, deb ogohlantirdi.
“Bizda javob bor. Men bunga uzoq vaqtdan beri tayyorgarlik ko‘rdim. Esingizda bo‘lsa, men ‘Polonezlar”, raketa ishlab chiqarish va hokazolar haqida aytgandim. Siz (Minskning raqiblari) butunlay ushbu raketalar hujumi ostidasiz. Men idoralarda yoki saroylarda kim o‘tirganiga qarab o‘tirmayman”, — dedi u.
G‘arb davlatlari Rossiyaning Ukrainaga bostirib kirishini qo‘llab-quvvatlagani uchun Belarusga qarshi sanksiyalar kiritgan edi. Lukashenkoning ta’kidlashicha, Belarus harbiylari Rossiyaning “maxsus operatsiyasida” qatnashayotgani yo‘q.
Izoh (0)