Finlyandiyaning Rossiya bilan chegarasi yaqinidagi Janubiy Kareliya provinsiyasining Lappeenranta shahri o‘z aeroportiga NATO bazasini joylashtirishni taklif qilishga tayyor. Bu haqda shahar meri Kimmo Yarva ma’lum qildi.
“Agar qurolli kuchlar xohlasa, albatta buning imkoni bo‘ladi”, — dedi shahar rahbari va bu sohada mutaxassis bo‘lmagani uchun harbiylarni qayerga joylashtirishni belgilay olmasligini ta’kidladi.
Yarvaning qo‘shimcha qilishicha, Finlyandiyaning NATOga a’zo bo‘lish istiqboli Janubiy Kareliyaga, jumladan, chegara provinsiyasida ishlashga tayyor bo‘lgan kompaniyalar uchun umid va xavfsizlik hissini beradi. Merning so‘zlariga ko‘ra, shaharda NATO bazasini yaratish bo‘yicha muhokamalar Finlyandiya alyansga qo‘shilish haqida gapirayotgan paytdayoq boshlangan.
Finlyandiya va Shvetsiya Rossiyaning Ukrainadagi bosqini boshlanganidan keyin NATOga kirish istagini bildirdi va may oyida ariza topshirdi. Ularni qabul qilish uchun NATOga a’zo barcha 30 davlatning qo‘llab-quvvatlovi zarur, biroq Turkiya bunga qarshi chiqdi: u ikki davlatni o‘z hududida Anqara tomonidan tan olingan terrorchi Kurdiston Ishchilar partiyasi a’zolarini yashirganlikda aybladi.
28—30-iyun kunlari Madridda bo‘lib o‘tgan NATO sammiti arafasida uch davlat murosaga erishdi va Turkiya veto huquqidan voz kechdi, Stokgolm va Xelsinki rasman NATOga taklif qilingan davlatlar maqomini oldi. Endi ularning alyansga kirishi ishtirokchi mamlakatlar parlamentlari tomonidan tasdiqlanishi kerak.
Rossiya prezidenti Vladimir Putin Shvetsiya va Finlyandiyaning NATOga kirishi Moskva xavotiriga sabab bo‘lmasligini aytgan. Ammo u bundan Rossiyaga tahdidlar paydo bo‘lgan taqdirda mamlakat zudlik bilan javob qaytarishni aytgan.
Izoh (0)