Madridda o‘tgan NATO sammitidan keyin Avstraliya bosh vaziri Entoni Albaniz Vladimir Zelenskiy bilan uchrashish uchun 3-iyul kuni Ukarinaga keldi. Albaniz Ukrainaga tashrif doirasida Bucha, Irpen va Gostomel shaharlarida bo‘lgan, deyiladi The Australian xabarida.
Xavfsizlik choralari tufayli Avstraliya bosh vazirining Ukrainaga kelishi oldindan anons qilinmagan. Kiyevga Entoni Albaniz Ukraina maxsus xizmatlari hamrohligida tashrif buyurgan.
Kiyev viloyat davlat administratsiyasi raisi Aleksey Kuleba ijtimoiy tarmoqlarda Avstraliya bosh vazirining guvohi bo‘lgan vayronagarchiliklar ko‘rib ukrainaliklarga qayg‘urgani haqida yozgan.
Albaniz Avstraliyaning Ukrainani qo‘llab-quvvatlashi va bu yerda sodir etilgan harbiy jinoyatlar uchun keskin jazo choralari ko‘rilishi tarafdori ekanligini qayd etgan.
Avvalroq Avstraliyaning Ukrainaga 285 million Avstraliya dollari (198 million AQSH dollari) yordam paketi ajratgani va Kiyevga 4 ta M113AS4 zirhli transportyori taqdim etgani xabar qilingandi. Mamlakat Ukrainaga jami 14 ta shunday jangovar mashina yetkazib berishni rejalashtirgan.
Izoh (0)