Melitopol meri Rossiya harbiy bazasi yo‘q qilinganini ma’lum qildi

Ukraina Qurolli kuchlari Melitopolga o‘ttizdan ortiq zarba berdi va shaharda joylashgan to‘rtta Rossiya harbiy bazasidan birini ishdan chiqardi. Bu haqda bosib olingan shahar meri Ivan Fedorov ma’lum qildi. Uning aniqlik kiritishicha, zarbalar faqat harbiy obyektlarga berilgan.

O‘z navbatida Rossiya davlat matbuoti tomonidan Zaporojye viloyatining “harbiy-fuqarolik ma’muriyati rahbari’ sifatida ta’riflangan Yevgeniy Balitskiy Ukraina Qurolli kuchlari Melitopolning turar-joy va infratuzilmasiga zarba berishga uringanini aytdi.

“Havo hujumidan mudofaa tizimlarining o‘z vaqtida ishga tushirilishi tufayli aholi turar-joylariga zarar yetkazilmadi, aerodrom hududiga snaryadlar tushdi. Aviashaharchadagi xususiy uy xo‘jaliklari va ko‘p qavatli turar joy binolariga qisman zarar yetdi”, — deb yozadi u o‘z Telegram kanalida.