Bugatti kompaniyasi Ettore Bugatti Ebega bag‘ishlangan Le’Ebe nomi ostidagi eksklyuziv Chiron giperkariga oid ma’lumotlarni oshkor qildi. Bu kabi versiyada faqat uch nusxa avtomobil ishlab chiqariladi. Ular to‘q ko‘k uglerod tolali kuzovi, 24 qirotli oltin dekori va yaratishga besh yil vaqt ketgan Macaron logotipi bilan ajralib turadi. Detal qo‘lda ishlangan bo‘lib, unga 10 soat vaqt sarflangan, deb xabar beradi Motor.
Ovalsimon oltin Macaron logotipi ustida besh yil davomida Bavariyaning Poellath GmbH & Co. ustaxonasi bilan ish olib borilgan. Mutaxassislar ideal nusxani olgunga qadar qimmatbaho material ustida ko‘plab laboratoriya sinovlarini o‘tkazgan. Chiron Le’Ebe logotipi oddiy Chiron emblemasidan nikel bilan qoplangan kumushi orqali farqlansa-da, Bugatti uni yangi deb atashni ma’qul ko‘rmoqda.
Logotip qalinligi 3-4 mikrometrga teng 24 qirotli oltin bilan qoplangan. U qo‘lda sepiladi, shundan so‘ng sayqallanadi. E’tiborli jihati, barcha operatsiyalar qo‘lda bajariladi, shu sababli bitta logotipning o‘zini yasashga 10 soat vaqt ketadi. Oltin bilan, shuningdek, radiator panjarasi, kapot va EB monogrammasi qoplangan. Metallning go‘zalligini buzmaslik uchun Bugatti hatto himoya lakidan foydalanishni istamagan.
Texnik jihatdan Chiron Le’Ebe oddiy modellardan farq qilmaydi. Giperkar 1500 ot kuchini taqdim etuvchi 8.0 litrli W16 yordamida harakatga keladi.
Avvalroq Bugatti brendi “taqali” krossovkalarini taqdim etgandi.
Izoh (0)