Bugun, 1-iyul kuni Toshkent shahrida Ready 4 Trade Markaziy Osiyo loyihasi doirasidagi elektron tijorat kursini tamomlagan 21 nafar hunarmandga sertifikat topshirish marosimi o‘tkazildi. Bu haqda “Daryo” muxbiri xabar bermoqda.
Loyiha Yevropa ittifoqi tomonidan moliyalashtirilgan bo‘lib, Xalqaro savdo markazi tomonidan amalga oshirilmoqda. Markazning elektron tijorat bo‘yicha maslahatchisi Annabel Sayksning aytishicha, mazkur loyiha o‘z samarasini bera boshlagan.
“Loyihamiz 2020-yildan boshlangan bo‘lib, o‘tgan 18 oy davomida O‘zbekistonning 12 ta viloyatidagi 40 ta kichik va o‘rta biznes vakillarini elektron tijorat bo‘yicha o‘qitdik. Bugun ulardan 21 nafariga “kichik va o‘rta biznes uchun elektron savdo” o‘quv kursini tamomlagani bo‘yicha sertifikatlar taqdim etildi. Loyihada 8 ta milliy trenerlar yetishib chiqdi. Loyiha davomida ishtirokchilar 108 ming dollarlik sotuvlarni onlayn tarzda amalga oshirishdi.
Xususan, tadbirkorlar turli xil marketpleyslar bilan ishlashni, xususan, eBay, Amazon, Alibaba platformalarida savdo qilishni o‘rganishdi. Onlayn do‘konlar ochishdi. Shuningdek, loyiha doirasida elektron tijoratni o‘rganishga mo‘ljallangan o‘zbek tilidagi YouTube platformasida 5 ta videodars yaratdik”, – dedi u.
Tadbirda Yevropa Ittifoqining O‘zbekistondagi delegatsiyasi hamkorlik bo‘limi boshlig‘i Fransua Bejo ham o‘z fikrlarini bildirdi.
“Onlayn tijoratni rivojlantirish zamon talabi. Bugun raqamli tijoratsiz hayotni tasavvur qilish qiyin. Hamma mahsulotni uydan yoki ofisdan turib bemalol onlayn sotib olish imkoni mavjud. Biz amalga oshirayotgan loyiha ham aynan elektron tijoratni rivojlantirishga asoslangan”, – dedi Yevropa Ittifoqi vakili.
Maxsus sertifikatni qo‘lga kiritgan miniaturachi rassom Feruz Temirov ham mazkur loyiha to‘g‘risidagi fikrlarini aytdi.
“Buxoro shahrida galereyam bor. Mazkur loyiha pandemiya davrida boshlangan edi. Bunda Markaziy Osiyolik hunarmandlarni qo‘llab-quvvatlash, ya’ni ularning mahsulotlarini onlayn do‘kon orqali sotishni o‘rgatish maqsad qilingan. Men ham loyihada qatnashdim. Bizga mutaxassislar Zoom tarmog‘i orqali onlayn dars o‘tdi. Masalan, eBay platformasida qanday sayt ochish kerakligi, pul o‘tkazmalari qay tartibda amalga oshirilishi, qaysi pochtalar orqali xaridorga mahsulot yetkazib berish mumkinligi bo‘yicha bilim oldik.
Shu loyiha yordamida eBay’da “Art Feruz” onlayn do‘konimni ochdim va juda ko‘p xaridorlarga ega bo‘ldik. Shu bilan birga, o‘nlab kolleksionerlar bilan ham tanishdim. Savdo platformasi orqali dunyo bozoriga chiqa boshladik. Hozirda AQSH, Yevropa davlatlariga mahsulotlar sotyapmiz. Bu men uchun yangi imkoniyat bo‘ldi”, – dedi rassom.
Izoh (0)