Бугун, 1 июль куни Тошкент шаҳрида Ready 4 Trade Марказий Осиё лойиҳаси доирасидаги электрон тижорат курсини тамомлаган 21 нафар ҳунармандга сертификат топшириш маросими ўтказилди. Бу ҳақда «Дарё» мухбири хабар бермоқда.
Лойиҳа Европа иттифоқи томонидан молиялаштирилган бўлиб, Халқаро савдо маркази томонидан амалга оширилмоқда. Марказнинг электрон тижорат бўйича маслаҳатчиси Аннабел Сайкснинг айтишича, мазкур лойиҳа ўз самарасини бера бошлаган.
«Лойиҳамиз 2020 йилдан бошланган бўлиб, ўтган 18 ой давомида Ўзбекистоннинг 12 та вилоятидаги 40 та кичик ва ўрта бизнес вакилларини электрон тижорат бўйича ўқитдик. Бугун улардан 21 нафарига «кичик ва ўрта бизнес учун электрон савдо» ўқув курсини тамомлагани бўйича сертификатлар тақдим этилди. Лойиҳада 8 та миллий тренерлар етишиб чиқди. Лойиҳа давомида иштирокчилар 108 минг долларлик сотувларни онлайн тарзда амалга оширишди.
Хусусан, тадбиркорлар турли хил маркетплейслар билан ишлашни, хусусан, eBay, Amazon, Alibaba платформаларида савдо қилишни ўрганишди. Онлайн дўконлар очишди. Шунингдек, лойиҳа доирасида электрон тижоратни ўрганишга мўлжалланган ўзбек тилидаги YouTube платформасида 5 та видеодарс яратдик», – деди у.
Тадбирда Европа Иттифоқининг Ўзбекистондаги делегацияси ҳамкорлик бўлими бошлиғи Француа Бежо ҳам ўз фикрларини билдирди.
«Онлайн тижоратни ривожлантириш замон талаби. Бугун рақамли тижоратсиз ҳаётни тасаввур қилиш қийин. Ҳамма маҳсулотни уйдан ёки офисдан туриб бемалол онлайн сотиб олиш имкони мавжуд. Биз амалга ошираётган лойиҳа ҳам айнан электрон тижоратни ривожлантиришга асосланган», – деди Европа Иттифоқи вакили.
Махсус сертификатни қўлга киритган миниатурачи рассом Феруз Темиров ҳам мазкур лойиҳа тўғрисидаги фикрларини айтди.
«Бухоро шаҳрида галереям бор. Мазкур лойиҳа пандемия даврида бошланган эди. Бунда Марказий Осиёлик ҳунармандларни қўллаб-қувватлаш, яъни уларнинг маҳсулотларини онлайн дўкон орқали сотишни ўргатиш мақсад қилинган. Мен ҳам лойиҳада қатнашдим. Бизга мутахассислар Zoom тармоғи орқали онлайн дарс ўтди. Масалан, eBay платформасида қандай сайт очиш кераклиги, пул ўтказмалари қай тартибда амалга оширилиши, қайси почталар орқали харидорга маҳсулот етказиб бериш мумкинлиги бўйича билим олдик.
Шу лойиҳа ёрдамида eBay’да «Арт Феруз» онлайн дўконимни очдим ва жуда кўп харидорларга эга бўлдик. Шу билан бирга, ўнлаб коллексионерлар билан ҳам танишдим. Савдо платформаси орқали дунё бозорига чиқа бошладик. Ҳозирда АҚШ, Европа давлатларига маҳсулотлар сотяпмиз. Бу мен учун янги имконият бўлди», – деди рассом.
Изоҳ (0)