Ўзбекистонда келаётган ҳафта бошидан ҳаво ҳарорати пасайиши кутилмоқда

«Ўзгидромет» яқин кунлар учун об-ҳаво прогнозини эълон қилди.

Унга кўра, дам олиш кунлари иссиқ яна кўтарила бошлайди. Якшанба кунига келиб, ҳарорат 38-41 даражагача кўтарилади. 2—3 июль кунлари жанубий ҳудудларнинг энг чекка қисмида 43-45 даражагача бўлган ҳарорат билан жуда иссиқ об-ҳаво сақланиб туради.

Бироқ бу иссиқ узоқ вақт давом этмайди. Кейинги ҳафтанинг бошидан эса республика ҳудудига Волга бўйи ҳудудларидан салқин ҳаво кириб келади. Душанба кунидан ҳарорат аста-секин пасайишни бошлайди ва ҳафтанинг аксарият қисмида 30-35 даража атрофида, баъзи жойларда 37-38 даражагача бўлади.

Республика ҳудудининг катта қисмида 1—3 июль кунлари асосан кам булутли об-ҳаво кузатилади, фақат Қорақалпоғистонда якшанба куни қисқа муддатли ёмғир ёғиши, момақалдироқ бўлиши мумкин.

Республика бўйича баъзи жойларда шамол 15-20 метр/секундгача кучайиши, баъзи жойларда чанг-тўзонлари кузатилиши мумкин. 3 июлда шимолда ва чўл ҳудудларда шамол 23-28 метр/секундгача кучайиши мумкин.

1—3 июлда Фарғона вилоятининг тоғ олди ва тоғли ҳудудларида гляциал (муз) сел-сув тоқин ҳодисалари юзага келиши мумкин.

Эслатиб ўтамиз, «Ўзгидромет» мутахассиси Эркин Абдулаҳатов «Дарё» мухбири билан суҳбатда ҳаво ҳарорати 4 июлдан кейин 8-10 даражага пасайиши кутилаётганини айтганди. Июль ойининг иккинчи ва учинчи ўн йилликларида ҳарорат асосан 35–38 даража атрофида бўлиши, айрим кунлари баъзи жойларда 40–42 даражагача кўтарилиши кутилмоқда.