Bungacha Isroil tashqi ishlar vaziri lavozimini egallab kelgan Yair Lapid mamlakat hukumatini boshqarishga o‘tdi, deb yozadi The Times of Israel gazetasi. Lapid parlament o‘z-o‘zini tarqatib yuborganini e’lon qilganidan keyin hukumat rahbari sifatida ish boshladi, bosh vazir Naftali Bennet esa o‘z lavozimini tark etishga qaror qildi.
Lapid mamlakat tarixidagi 14-bosh vazir bo‘ldi. U bu lavozimda kamida 1-noyabrgacha, ya’ni Isroilda navbatdan tashqari parlament saylovlari o‘tkazilgunga qadar qoladi.
“Yaxshi, kuchli va gullab-yashnagan yahudiy demokratik davlatini qurish uchun qo‘limizdan kelganini qilamiz, chunki bu bizning ishimiz va u barchamizdan muhimroqdir”, — dedi Lapid lavozmni egallash marosimida.
Gazetaning yozishicha, yangi bosh vazirning birinchi rejalari qatorida — Isroil xavfsizlik boshlig‘i Ronen Bar bilan uchrashish, shuningdek, HAMAS nazorati ostidagi G‘azo sektorida asirga olingan ikki isroillik askar va u yerda qolayotgan yana ikki isroillik askarning jasadi masalasini muhokama qilish bor.
Isroil parlamenti Knesset 30-iyun kuni o‘zini tarqatib yuborish uchun ovoz berdi. Bennet parlamentni tarqatib yuborish to‘g‘risidagi qarorni o‘n kun oldin e’lon qilgan. The Times of Israel nashrining yozishicha, bunga hukumat a’zolari Tel-Aviv markazida metro tizimini yaratishga ruxsat beruvchi qonun loyihasini qabul qilish bo‘yicha kelisha olmagani sabab bo‘lgan.
Bennettdan oldin bosh vazir bo‘lgan (avvaliga 1996-yildan 1999-yilgacha, so‘ngra 2009-yildan 2021-yil iyuniga qadar) Benyamin Netanyaxuning muxolifatdagi “Likud” partiyasi bo‘lajak saylovlarda ishtirok etishga qaror qildi. Netanyaxu Isroil hukumatiga yana boshchilik qilmoqchi ekanini aytdi.
Izoh (0)