Britaniyalik milliarder, Virgin Galactic asoschisi Richard Brenson Ukrainaga yangi An-225 “Mriya” transport samolyotini qurishda yordam bermoqchi. Bu haqda Ukrainaning Rossiya bilan muzokaralar delegatsiyasi rahbari Devid Araxamiya Telegram’da ma’lum qildi.
Araxamiyaning so‘zlariga ko‘ra, tadbirkorning Gostomelga tashrifi chog‘ida kosmik sohadagi hamkorlikning shu va boshqa masalalari muhokama qilingan. “U qo‘lidan kelganicha yordam berishga tayyorligini bildirdi”, — dedi ukrainalik siyosatchi.
Araxamiya, shuningdek, yangi samolyot loyihasi ustida allaqachon ish boshlanganini ta’kidladi.
27-fevral kuni Kiyev viloyatidagi Gostomel aerodromida Ukrainaning An-225 “Mriya” transport samolyoti Rossiya kuchlari tomonidan yo‘q qilingani ma’lum bo‘ldi. “Ukroboronprom” konsernining ta’kidlashicha, samolyotni rekonstruksiya qilish uchun taxminan uch milliard dollar va besh yildan ko‘proq vaqt kerak bo‘ladi.
Avvalroq Buyuk Britaniya Ukrainaga harbiy yordam uchun bir milliard yevro ajratishi ma’lum qilingandi. Yordam dronlar va havo mudofaasi tizimlarini o‘z ichiga oladi. Shu tariqa, Britaniya tomonidan Kiyevga urush boshlangandan beri ajratilgan umumiy yordam miqdori 2,6 milliard yevrodan oshadi.
Izoh (0)