Fransiya prezidenti Emmanuel Makron Avstraliya bosh vaziri Entoni Albaneze bilan suvosti kemalari shartnomalarining buzilishi tufayli uzilgan munosabatlarni tiklash uchun ikki tomonlama muzokaralar o‘tkazadi. Bu haqda SBS News xabar berdi.
Fransiya rahbari 1-iyul, juma kuni ertalab Yelisey saroyida Avstraliya yetakchisini qabul qiladi. Kanberra va Parij Avstraliyaning sobiq bosh vaziri Skott Morrison 2021-yil sentabr oyida dizel suvosti kemalarini qurish bo‘yicha Fransiya shartnomasini AQSH yadroviy suvosti kemalari foydasiga bekor qilganidan keyin vaziyatni tuzatishga qaror qildi.
2021-yil sentabrida Avstraliya hukumati Fransiya bilan 2016-yilda jami 66 milliard dollarga tuzilgan 12 ta dizel suvosti kemasini qurish bo‘yicha shartnomani bir tomonlama bekor qilgan edi. Kanberraning qarori tomonlarni diplomatik mojaroga olib keldi. O‘shanda Fransiyaning amaldagi tashqi ishlar vaziri Jan-Iv Le Drian Fransiya dengiz floti guruhi bilan suvosti kemasi shartnomasining bekor qilinishini mamlakatga bo‘lgan ishonchga putur yetkazish deb atagan.
Avstraliya hukumati Fransiyaning kemasoz Naval Group kompaniyasiga ko‘p milliard dollarlik shartnomani buzgani uchun 585,2 million dollar tovon to‘laydi. Albaneze hukumati Fransiyaning Hind—Tinch okeani mintaqasidagi roli va ishtirokini yuksak qadrlashini qayd etdi. Uning so‘zlariga ko‘ra, endi ikki davlat “umumiy tamoyillar va manfaatlarni himoya qilish uchun” yana birlasha oladi.
Izoh (0)