Туркияда маймунчечак билан касалланишнинг биринчи ҳолати тасдиқланди. Бу ҳақда мамлакат соғлиқни сақлаш вазири Фаҳреддин Кожага таяниб, «РБК» хабар берди.
«Беморларимиздан бирида маймунчечак аниқланди. 37 ёшли беморда иммун тизими танқислиги бор. У изоляция қилинган. Динамик кузатув ўтказилди, бошқа одамларда касаллик аниқланмади,» — дея ёзган Кожа Twitter’да. У касаллик ҳаво томчилари билан эмас, балки яқин жисмоний контакт орқали юқишини таъкидлаган.
Кожа касаллик Туркиянинг қайси шаҳрида қайд этилганига аниқлик киритмади.
Маймунчечак Африкадан ташқарида шу йилнинг май ойида тарқала бошлади. Буюк Британия касалланиш ҳолатлари ҳақида биринчи бўлиб хабар берди. Вирус Нигериядан келган самолёт йўловчисида топилган. Кейинчалик, бошқа мамлакатлар, жумладан, Австралия, Бельгия, Канада, АҚШ, Грузия, Жанубий Корея ва бошқалар маймунчечак ҳақида хабар берди.
ЖССТ маймунчечакнинг ушбу эпидемиясини халқаро аҳамиятга молик фавқулодда ҳодисаси эмас, деган хулосага келди. Ташкилот маълумотларига кўра, йил бошидан 22 июнгача дунёнинг 50 та давлатида 3413 кишида маймунчечак қайд этилган.
Изоҳ (0)