Toshkent shahrida yashovchi ayol kelini bergan ovqatdan shubhalanib, uni ekspertizaga olib kelgan va qaynonaning shubhasi tasdiqlangan. Bu haqda Hadicha Sulaymonova nomidagi respublika sud ekspertiza markazi ma’lumotlariga tayanib, “Zamon.uz” xabar berdi.
Markaz mutaxassisining qayd etishicha, tekshiruv davomida kelin qaynonasining joniga qasd qilish maqsadida uning ovqatiga zararli modda va mayda shisha siniqlarini solib kelgan.
“Shu ovqatdan mening shubham bor. Kelinim ovqat olib keldi, ammo ichgim kelmayapti. Ichki tuyg‘um tekshirtir, ichida biror narsa yo‘qmikan, degan xulosaga undadi.
Kelin qaynonasini o‘ldirish uchun yillar davomida suyuq ovqatga kam-kamdan modda qo‘shib kelgan. Ma’lum bir vaqt o‘tgandan keyin uning ahvoli yomonlashgan, kasalxonaga tushgan. U yerda oxirgi yegan ovqatini tekshirish tavsiya qilingan. Ayolning oshqozonidan olingan ovqat qoldig‘i tibbiy-ekspertizaga yuborilgan. Ekspertizada odam organizmiga ziyon keltiruvchi modda hamda shishaning mayda siniqlari topilgan”, — deydi Materiallar, ashyolar, buyumlar kriminalistik ekspertizasi laboratoriyasi mudiri Raqiya Ahmedova.
Ta’kidlanishicha, markazda oziq-ovqat ekspertizasi bo‘limi ochilganiga endi 3 yil bo‘lgan. Shuningdek, 2021—2025-yillar Respublika sud ekspertiza markazi faoliyatida yangi bosqich bo‘lishi kutilmoqda, 16 ta yangi ekspertiza va tadqiqot turlarini joriy etish belgilangan.
Izoh (0)