Sog‘liqni saqlash vazirligi Sanitariya-epidemiologik osoyishtalik va jamoat salomatligi xizmati Epidemiologiya va yuqumli kasalliklar profilaktikasi boshqarmasi boshlig‘i Rustam Ikromov fuqarolarga ehtiyotkorlik yuzasidan tibbiy niqoblarni taqib yurishni tavsiya qildi.
“Hozircha jamoat joylarida tibbiy niqob taqib yurish bo‘yicha Respublika maxsus komissiyaning qarori kelmadi, biroq sog‘liqni saqlash va ehtiyotkorlik yuzasidan tibbiy niqoblarni taqib yurishni maslahat beramiz.
Uning so‘zlariga ko‘ra, ayni damda koronavirusning omikron shtammi ko‘proq uchramoqda. “Kasallikka chalinayotganlar orasida 90 foizi — emlanmagan fuqarolar. Qolgani 10 foizi esa vaksina olganiga 1 yildan ko‘p bo‘lgan, immuniteti past fuqarolar yoki homilador ayollar va bolalardir. Hozirga qadar ro‘yxatga olingan barcha vaksinalar o‘z samarasini ko‘rsatmoqda va shu munosabat bilan mamlakatimizda aynan shu vaksinalardan foydalanish davom ettiriladi”, — deydi Ikromov.
Ta’kidlash kerakki, so‘nggi kunlarda O‘zbekiston prezidenti raisligida bo‘lib o‘tgan yig‘ilishlarda mutasaddilar yana niqobda ko‘rinish bermoqda.
23-iyun kuni Sanitariya-epidemiologik osoyishtalik va jamoat salomatligi xizmati boshlig‘i Bahodir Yusupaliyev O‘zbekistonda koronavirus omikron shtammining eng yuqumli deb aytilayotgan Stealth-Omicron BA.2 varianti aniqlanganini ma’lum qilgandi. Mamlakatda koronavirus infeksiyasi bilan kasallanish holati bir necha kundan buyon ortmoqda. Xususan, 28-iyunda — 98 kishida, 27-iyunda — 91 kishida, 26-iyunda — 133 kishida, 25-iyunda 139 kishida kasallik qayd etilgan.
Izoh (0)