Россия Финляндия ва Швециянинг НАТОга қўшилиши хавотирда эмас, бироқ ушбу мамлакатларга альянс ҳарбий инфратузилмаси жойлаштирилишига худди шундай йўл билан жавоб қилади. Бу ҳақда мамлакат президенти Владимир Путин олтинчи Каспий саммити якунида айтиб ўтди, деб ёзади «РБК».
«Финляндия ва Швециянинг НАТОга аъзолиги нуқтаи назаридан бизни ташвишга соладиган ҳеч нарса йўқ. Улар шуни хоҳлаяптими — марҳамат. Фақат улар шуни аниқ билиб олсинки, аввал улар учун ҳеч қандай таҳдид бўлмаган бўлса, энди у ерга ҳарбий контингент ва инфратузилма жойлаштирилган тақдирда, биз худди шу тарзда жавоб қайтаришга ва бизга хавф солаётган ҳудудлар учун худди шундай таҳдидлар яратишга мажбур қоламиз», — деди давлат раҳбари.
Айни вақтда президент қайд этишича, Ғарб мамлакатларининг Украинани Россия билан музокаралардан бош тортишга даъватлари буларнинг барчаси бирлашган Ғарбнинг империяга оид орзу-ҳавасларига эришиш учун қилинаётганини тасдиқлайди. «Бу ўзларининг шахсий манфаатларини ҳимоя қилиш воситаси. Яъни украинлар, украин халқи қўллари билан наточилар ва НАТОнинг етакчи мамлакатлари шунчаки қўшимча равишда ўз-ўзига ишонч ҳосил қилмоқчи, ўзининг дунёдаги ролини тасдиқламоқчи, етакчиликни эмас, балки ўз гегемонизмини, ўзининг империялик орзу-ҳавасларини тасдиқламоқчи», — дея аниқлик киритди у.
28 июнь куни кечқурун Туркия Швеция ва Финляндияни НАТОга таклиф қилиш бўйича эътирозини қайтариб олгани маълум бўлди. Шундан кейин Финляндия ва Швеция НАТОга аъзо бўлиш таклифини олди.
Туркия шу пайтгача Швеция ва Финляндиянинг НАТОга қўшилишига тўсқинлик қилиб келаётган эди. Анқара ушбу мамлакатлардан ўзи террорчилик ташкилоти деб ҳисоблайдиган Курдистон ишчилар партияси аъзоларининг топширилишини, у билан боғлиқ бақрча ташкилотлар ёпилишини, шунингдек, бу борада кафолатлар берилишини талаб қилганди.
Столтенберг Туркиянинг терроризмнинг қўллаб-қувватланиши борасидаги хавотирларини ўринли деб атаганди.
Бу орада НАТОга аъзо давлатлар раҳбарлари Мадриддаги саммитда альянснинг янги стратегик концепциясини маъқуллади. Россия янги концепцияда альянс хавфсизлигига «энг асосий ва бевосита таҳдид» сифатида белгиланган.
Изоҳ (0)