Аввал хабар берилганидек, 25 июнь куни Ўзбекистон Конституциясига ўзгартишлар киритиш тўғрисидаги қонун лойиҳаси жамоатчилик муҳокамасига қўйилди.
Конституцияга киритилаётган ўзгаришларга кўра интеллектуал мулкка бўлган ҳуқуқ кафолатланмоқда.Жумладан, Конституциянинг 36-моддаси қуйидагича кўриниш олиши кўзда тутилган:
"Ҳар ким қонун билан муҳофаза қилинадиган мулкка, шу жумладан интеллектуал мулкка бўлган ҳуқуққа эга".
Президент Шавкат Мирзиёев 2020 ил 12 октябр куни интеллектуал мулк объектларини муҳофаза қилиш тизимини такомиллаштириш чора-тадбирлари юзасидан ўтказилган йиғилишда «Интеллектуал мулк масаласини давлат сиёсати даражасига кўтармас эканмиз, Ўзбекистон бундан ўн йилдан кейин ҳам рақобатдош бўлмайди» деб таъкидлаб, мазкур соҳани ривожининг асосий устувор йўналишини белгилаб берди.
Ўзбекистон Республикаси Президентининг 2022 йил 26 апрелдаги ПҚ-221-сон қарори билан 2022-2026 йилларда Ўзбекистон Республикасида интеллектуал мулк соҳасини ривожлантириш Стратегияси ҳам тасдиқланган.
Замонавий дунёда интеллектуал мулк ҳимоясини таъминлаш муҳим аҳамиятга эга. Инсонни ақлий меҳнати маҳсули бўлган рақамли технологиялар ва инновациялар XXI асрда мамлакат иқтисодиётини асосий ҳаракатлантирувчи кучига айланмоқда. Бугунги кунда номоддий актив ҳисобланган интеллектуал мулк кириб бормаган ва таъсирига учрамаган бирор соҳа, тармоқ қолмади.
Статистик маълумотларга кўра, номоддий активлар улуши 1975 йилда 17 фоизни ташкил этган бўлса, 2020 йилда эса 90 фоизга кўтарилиб, уларнинг тахминий қиймати 21 триллион АҚШ долларини ташкил этмоқда. 2020 йилда бутун дунёни ўз доирасига қамраб олган Cовид-19 пандемияси жараёнида ҳам интеллектуал мулк объектларини нақадар инсон ҳаётининг ажралмас қисмига айланиб улгургани исботлади. Шу боис, ушбу ҳуқуқни конституциявий даражада эътирофини амалга оширмасдан туриб, самарали иқтисодий-ижтимоий ривожланишни таъминлаш мураккаб вазифа ҳисобланади.
Изоҳ (0)