2022/23-yilgi mavsumdan boshlab A Seriyada “oltin o‘yin” qoidasi amalga kiritiladi.
Italiya futbol federatsiyasi yig‘ilishida chempionat reglamentiga kiritilgan o‘zgartirishlar tasdiqlandi, deya xabar qilmoqda Football Italia.
Unga ko‘ra, musobaqa jadvalida yuqoridagi ikki jamoa bir xil ochko jamg‘argan taqdirda, chempionni aniqlash uchun “oltin o‘yin” o‘tkaziladi.
Bunday o‘yin formati qo‘shimcha vaqtlarni o‘z ichiga olmaydi. Agar 90 daqiqada yakunida durang natija qayd etilsa, jamoalar darhol penaltilar seriyasiga yo‘l oladi.
Ushbu yangilik faqatgina Italiya chempionini aniqlashga ishlatiladi. Agar jamoalar yevrokuboklar uchun kurashayotgan bo‘lsa, ochkolar teng bo‘lib qolgan taqdirda, yakuniy natija o‘zaro uchrashuvlarga qarab belgilanadi.
Bundan tashqari, Italiya chempionatida o‘yin davomida 5 futbolchi almashtirishga ruxsat berildi.
2021/22-yilgi mavsumda “Milan” “Inter”ni 2 ochko ortda qoldirgan holda skudettoni qo‘lga kiritgandi.
Izoh (0)