Ўзбекистонда жамоатчилик томонидан ижтимоий тармоқларда билдирилаётган фикрлар мухолифат ҳисобланади. Бу ҳақда Олий Мажлис Сенати раиси Танзила Норбоева «Америка овози»га берган интервьюсида маълум қилди.
«Америка овози» мухбирининг «Ўзбекистонда мухолифат борми» деган саволига Сенат раиси Танзила Норбоева жавоб берар экан, халқнинг ўзи ҳам мухолиф бўлишини айтиб ўтди.
«Ўзбекистонда нега мухолифат йўқ, бор-ку, ҳамма жойда танқид бўляпти-ку. Лекин бу алоҳида институционал тарзда ташкил топиши ўзининг вақтини топса керак. Ҳозир фикр эркинлиги бор. Жуда ҳам кескин фикрлар билдирилади. Парламентга ҳам, раҳбариятга ҳам, ҳукуматгаям ва ҳоказо. Шунинг ўзи мухолифат эмасми? Халқнинг ўзи ҳам мухолифат бўлиши мумкин. Ривожланган мамлакатнинг ҳам интернетини очиб кўринг, ҳаттоки энг ривожланган, ҳамма тўқ мамлакатда ҳам ўз халқининг норозичилиги бўлади. Буни нормал ҳолат деб ҳисоблайман», — дейди Сенат раиси.
Норбоева аҳоли томонидан юқори органларга йўлланадиган мурожаатлар ўз эгасига етиб бориши ҳақида гапириб, эндиликда бу нарсага ҳожат йўқлиги, юқори орган вакиллари ҳам «паст»га тушганини айтди.
«Ҳозир юқори органлар ҳам «паст»га тушган. ОАВнинг кузацангиз, вазир, Олий суд раиси, бош прокурор ва бошқа юқори орган вакиллари «паст»га тушишган. Ҳозир аҳоли орасида «юқори» идора, «паст» қатлам бўлмаслиги учун президент Мирзиёев барча амалдорларни «паст»га туширган. Фуқаролар қайси идорага эътироз билан бормасин уларнинг дарди эшитилади», — дейди у.
Аввалроқ Танзила Норбоева «Америка овози»га берган интервьюсида Шавкат Мирзиёев бош вазир лавозимида ишлаган вақтларидан мажбурий меҳнатга қарши курашиш бошланганини айтгани ҳақида хабар берилганди.
Изоҳ (0)