O‘zbek klublari OFK Kubogidagi 50 o‘yinda 30 ta g‘alaba qayd etdi

“So‘g‘diyona” OFK Kubogi guruh bosqichi 2-turida Tojikistonning “SSKA” jamoasi ustidan g‘alaba qozondi.

Ushbu o‘yin O‘zbekiston klublari uchun OFK Kubogi doirasidagi 50-o‘yin bo‘ldi, deya xabar beradi futbol mutaxassisi Alisher Nikimbayev.

“Neftchi” o‘z debyutini nishonlagan 2009-yildan buyon 4 ta jamoa ushbu musobaqa doirasida 50 ta o‘yin o‘tkazgan. OFK Kubogida “Nasaf” 25 ta, “Neftchi” 16 ta, “Sho‘rtan” 7 ta, “So‘g‘diyona” 2 ta o‘yinda maydonga tushgan.

Bu o‘zbek klublari uchun OFK Kubogi doirasidagi 30-g‘alaba bo‘ldi. Qarshining “Nasaf” klubi hisobida 19 ta, “Neftchi”da 7 ta, “Sho‘rtan” va “So‘g‘diyona”da 2 tadan g‘alaba mavjud.

Ulug‘bek Baqoyev shogirdlarining muvaffaqiyatidan so‘ng O‘zbekiston klublarining OFK Kubogida jamg‘argan ochkolari 101 taga yetdi. “Nasaf” hisobida 60 ochko, “Neftchi”da 26, “Sho‘rtan”da 9 va “So‘g‘diyona”da 6 ochko mavjud.

Jizzaxliklar keyingi o‘yinini 30-iyun kuni “Altin Asr”ga (Turkmaniston) qarshi o‘tkazadi.