Energetika vazirligi Investitsiyalar va tashqi savdo vazirligi hamda Energiyani tejash tarmoqlararo jamg‘armasi bilan hamkorlikda “O‘zbekistonda binolar uchun toza energiya” loyihasini ishlab chiqdi. U Jahon bankining 143 million dollari miqdoridagi imtiyozli krediti ko‘magida amalga oshiriladi. Bu haqda Energetika vazirligi matbuot xizmati xabar berdi.
Loyihani amalga oshirish uchun Jahon banki guruhiga a’zo bo‘lgan Xalqaro taraqqiyot assotsiatsiyasi (XTA) O‘zbekiston hukumatiga past foiz stavkasida, muddati 30 yil, jumladan, besh yillik imtiyozli davr bilan imtiyozli moliyalashtirishni taqdim etadi.
O‘zbekistonning qayta tiklanuvchi energiya manbalari salohiyatini oshirish borasidagi yetakchi mavqeini, iqlim o‘zgarishiga qarshi kurashish bo‘yicha olib borilayotgan sa’y-harakatlarni xalqaro hamjamiyatning faol qo‘llab-quvvatlashini, shuningdek, energiya samaradorligini oshirish bo‘yicha ulkan maqsadlarni hisobga olgan holda, Jahon banki Ijroiya direktorlar kengashi loyihani bir ovozdan qo‘llab-quvvatlagan va uni amalga oshirish uchun Xalqaro taraqqiyot assotsiatsiyasining imtiyozli resurslaridan uzoq muddatli kredit ajratishni ma’qullagan.
Ushbu loyiha O‘zbekistonda energiya tejash va energiya samaradorligini oshirishga investitsiyalarni jalb qilish uchun bozor rag‘batlarini yaratishda muhim rol o‘ynash uchun mo‘ljallangan.
Loyiha mamlakatning barcha hududlarini qamrab oladi. Uning doirasida maktabgacha ta’lim, xalq ta’limi va sog‘liqni saqlash sohalarida 800 dan ortiq muassasani modernizatsiya qilish rejalashtirilgan.
Loyihaning asosiy natijasi jamoat binolarining energiya samaradorligini oshirish, shuningdek, energiya tejash va toza energiya ishlab chiqarishni rag‘batlantiruvchi loyihalarga investitsiyalarni jalb qilish tartib-qoidalarini tartibga soluvchi me’yoriy-huquqiy bazani takomillashtirishdan iborat bo‘ladi.
Avvalroq Energetika vazirligi huzurida Milliy dispetcherlik markazi tashkil etilgani, O‘zbekistonda besh oyda umumiy quvvati 1 254 megavatt bo‘lgan 6 ta yangi elektr stansiya ishga tushirilishi to‘g‘risida xabar berilgandi.
Izoh (0)